బెంగళూరు: స్టౌ ఆర్పకుండా గదిలో నిద్రపోయిన నలుగురు వ్యక్తులు కార్బన్ మోనాక్సైడ్ అనే విషవాయువును పీల్చి మరణించారు. అస్సాంకు చెందిన నలుగురు కార్మికులు బెంగళూరు రూరల్ జిల్లాలోని హోస్కోటేలో ఉన్న ఒక అద్దె గదిలో శవమై కనిపించారు. ఆ గదికి కనీసం గాలి ఆడే మార్గం (Ventilation) లేదు. శుక్రవారం రాత్రి వంట చేసిన తర్వాత వారు స్టౌ ఆర్పడం మర్చిపోయి ఉంటారని పోలీసులు భావిస్తున్నారు.
కిటికీలు, తలుపులు పూర్తిగా మూసివేసి ఉండటమే ఈ మరణాలకు ప్రధాన కారణమని ప్రాథమిక విచారణలో తేలింది. మృతులను జయంత్ సింగ్, నిరేంద్రనాథ్, డాక్టర్ టైడ్, ధనంజయ్ టైడ్ అని గుర్తించారు. వీరి వయస్సు 20 నుండి 22 ఏళ్ల మధ్య ఉంటుంది. వీరంతా సమీపంలోని కోకాకోలా వేర్‌హౌస్‌లో లోడింగ్, అన్-లోడింగ్ కార్మికులుగా పనిచేస్తున్నారు.
రాత్రి పూట చలిని తట్టుకోవడానికి వారు తలుపులు, కిటికీలు బిగించి వంట చేసుకున్నారు. ఆ తర్వాత స్టౌ ఆర్పకపోవడంతో గది అంతా కార్బన్ మోనాక్సైడ్ నిండిపోయింది. ఈ వాయువుకు రంగు, వాసన లేకపోవడంతో వారు నిద్రలోనే స్పృహ కోల్పోయి, ఊపిరి ఆడక ప్రాణాలు విడిచారు. శనివారం ఉదయం వారు పనికి రాకపోవడంతో సహచర కార్మికులు వచ్చి చూడగా ఈ ఘటన వెలుగులోకి వచ్చింది.
అస్సాం ముఖ్యమంత్రి హిమంత బిశ్వ శర్మ ఈ ఘటనపై సంతాపం వ్యక్తం చేశారు. మృతదేహాలను స్వగ్రామాలకు తరలించేందుకు కర్ణాటక ప్రభుత్వంతో సహకరిస్తామని ఆయన తెలిపారు.