భారతీయ సంగీత ప్రపంచాన్ని ఏడు దశాబ్దాల పాటు ఏలిన ‘స్వర కోకిల’ లతా మంగేష్కర్ అస్తమించిన నాలుగేళ్లకే, ఆమె సోదరి ‘స్వర సామ్రాజ్ఞి’ ఆశా భోస్లే (92) కూడా అనంత లోకాలకు తరలిపోయారు. ఏప్రిల్ 12, 2026 ఆదివారం నాడు ఆశా తాయి తుది శ్వాస విడిచారు. అయితే, ఈ ఇద్దరు దిగ్గజ సోదరీమణుల జీవిత ప్రయాణమే కాదు, వారి చివరి ప్రయాణం కూడా అచ్చం ఒకేలా సాగడం ఇప్పుడు అందరినీ ఆశ్చర్యానికి గురిచేస్తోంది. విధి రాసిన వింత స్క్రిప్టులా ఈ ఇద్దరు సోదరీమణుల మరణంలో అనేక అరుదైన యాధృచ్ఛికాలు కనిపిస్తున్నాయి.
మరణంలోనూ ‘సిస్టర్ కనెక్షన్’.. ఆ అరుదైన పోలికలు ఇవే!
1. ఒకే వయసు.. ఒకే ముగింపు: సంగీత ప్రపంచంలో ఎవరికి వారు ప్రత్యేక ముద్ర వేసినప్పటికీ, వీరిద్దరూ సరిగ్గా 92 ఏళ్ల వయసులోనే ఈ లోకాన్ని విడిచిపెట్టడం గమనార్హం.
2. ఆదివారం నాడే ఆఖరి ప్రయాణం: లతా మంగేష్కర్ 2022 ఫిబ్రవరి 6న మరణించగా, ఆ రోజు ఆదివారం. సరిగ్గా నాలుగేళ్ల తర్వాత ఆశా భోస్లే కూడా ఆదివారం నాడే కన్నుమూశారు.
3. ఒకే ఆసుపత్రి.. ఒకే చోట తుది శ్వాస: ముంబైలోని ప్రఖ్యాత బ్రీచ్ కాండీ ఆసుపత్రిలోనే ఈ ఇద్దరు సోదరీమణులు చికిత్స పొందుతూ తుది శ్వాస విడిచారు.
4. ప్రాణం తీసిన ఒకే రకమైన అనారోగ్యం: లతా జీ కోవిడ్ అనంతర సమస్యలతో ‘మల్టీ ఆర్గాన్ ఫెయిల్యూర్’ కారణంగా మరణించారు. ఆశా తాయి కూడా ఛాతిలో ఇన్ఫెక్షన్ తలెత్తి, చివరకు ‘మల్టీ ఆర్గాన్ ఫెయిల్యూర్’ కారణంగానే మరణించడం గమనార్హం.
సంగీతమే ప్రపంచం.. నటనపై విముఖత!
ఆశా భోస్లే కేవలం గాయని మాత్రమే కాదు, ‘బడీ మామీ’ వంటి రెండు చిత్రాల్లో నటించారు. కానీ, తనకు నటన కంటే పాటలే ప్రాణమని భావించి పూర్తిస్థాయిలో సంగీతానికే అంకితమయ్యారు.
గుర్తింపునిచ్చిన ఓపీ నయ్యర్.. దారి చూపిన ఎస్డీ బర్మన్
లతా మంగేష్కర్ హవా నడుస్తున్న కాలంలో తనకంటూ ఒక ప్రత్యేక శైలిని ఏర్పరచుకోవడంలో ఆశా భోస్లే ఎన్నో సవాళ్లు ఎదుర్కొన్నారు.
- ఓపీ నయ్యర్ మ్యాజిక్: ఆశా స్వరంలోని లోతును గుర్తించిన ఓపీ నయ్యర్, ‘నయా దౌర్’ (1957) వంటి చిత్రాలతో ఆమెను స్టార్‌గా మార్చారు.
- ఎస్డీ బర్మన్ తోడ్పాటు: 1957లో లతా మంగేష్కర్, ఎస్డీ బర్మన్ మధ్య విభేదాలు రావడంతో, ఐదేళ్ల పాటు ఆశా ఆయన క్యాంపులో ప్రధాన గాయనిగా వెలిగారు. ‘హాల్ కైసా హై జనాబ్ కా’ వంటి పాటలతో సరికొత్త ట్రెండ్‌ను సృష్టించారు.
ఆర్డీ బర్మన్‌తో అద్భుతాల ప్రస్థానం
తండ్రి ఎస్డీ బర్మన్‌తో పనిచేస్తున్న సమయంలోనే ఆశాకు ఆర్డీ బర్మన్ (పంచమ్ దా)తో పరిచయం ఏర్పడింది. 1966లో వచ్చిన ‘తీస్రీ మంజిల్’ వీరిద్దరి కలయికలో ఒక సంచలనం. వెస్ట్రన్ మ్యూజిక్, జాజ్, క్యాబరే వంటి వినూత్న ప్రయోగాలకు ఆశా స్వరం ప్రాణం పోసింది. ఆ తర్వాత వారిద్దరి మధ్య చిగురించిన ప్రేమ వివాహానికి దారితీసింది.
దశాబ్దాల పాటు తన పాటలతో భారతీయులను అలరించిన ఆశా భోస్లే.. తన అక్క లతా మంగేష్కర్ వెళ్ళిన మార్గంలోనే, అవే పోలికలతో నిష్క్రమించడం ఒక చారిత్రక యాధృచ్ఛికంగా మిగిలిపోతుంది.