ఉత్తరప్రదేశ్ రాష్ట్రం హాపుడ్ జిల్లాలో భద్రతా పరంగా అత్యంత ఆందోళన కలిగించే అంశం ఒకటి వెలుగులోకి వచ్చింది. గర్ ముక్తేశ్వర్ తహసీల్ పరిధిలోని దౌతాయి గ్రామంలో ఒక విదేశీ మహిళ గత కొన్నేళ్లుగా తన గుర్తింపు మార్చుకుని నివసిస్తోంది. గ్రామంలో అందరూ ఆమెను ‘రాణి బేగం’ అని పిలుచుకుంటారు, కానీ అసలు విచారణలో ఆమె బంగ్లాదేశ్ పౌరురాలు మహమూదా ఖాతూన్ అని తేలింది.
SIR విచారణలో బయటపడ్డ బండారం
ఓటరు జాబితా తనిఖీ కోసం అధికారులు నిర్వహించిన SIR (ధృవీకరణ) ప్రక్రియలో ఈ మోసం బయటపడింది. ఆ మహిళ సమర్పించిన పత్రాలపై అధికారులకు అనుమానం రావడంతో లోతుగా విచారించగా.. ఆమె తప్పుడు పత్రాలతో భారతీయ గుర్తింపు కార్డులు సృష్టించుకున్నట్లు తెలిసింది. గ్రామ సర్పంచ్ (ప్రధాన్) అఫ్సానా పేరుతో నకిలీ లెటర్ హెడ్‌ను వాడి పత్రాలు తయారు చేయించినట్లు నిర్ధారణ కావడంతో, సర్పంచ్ పోలీసులకు ఫిర్యాదు చేశారు.
అనుమానాస్పద పర్సు వెలుగులోకి తెచ్చిన నిజాలు
పోలీసులు నిందితుడు మస్రూఫ్ ఇంటిపై దాడి చేసిన సమయంలో అక్కడ ఎవరూ లేరు. ఇల్లంతా సోదాలు చేయగా ఒక మహిళా పర్సు దొరికింది. అందులో బంగ్లాదేశ్ పాస్‌పోర్ట్, వీసా, బంగ్లాదేశ్ కరెన్సీ (టాకా) లభ్యమయ్యాయి. ఆ పత్రాల ప్రకారం ఆమె పేరు మహమూదా ఖాతూన్ అని, ఆమెకు రోజా అనే కూతురు ఉందని తెలిసింది.
నిజాముద్దీన్‌లో నికా.. బంగ్లాదేశ్‌లో కూతురి జననం
పోలీసులకు దొరికిన నికా నామా (పెళ్లి పత్రం) ప్రకారం.. దౌతాయి గ్రామానికి చెందిన మస్రూఫ్, ఫిబ్రవరి 11, 2021న ఢిల్లీలోని హజ్రత్ నిజాముద్దీన్‌లో మహమూదా ఖాతూన్‌ను వివాహం చేసుకున్నాడు. దీనికి ఢిల్లీకి చెందిన ఇద్దరు వ్యక్తులు సాక్షులుగా ఉన్నారు. పెళ్లి తర్వాత ఆమె పేరును ‘రాణి బేగం’గా మార్చి రహస్యంగా గ్రామానికి తీసుకువచ్చాడు. వీరికి ముగ్గురు పిల్లలు ఉండగా, పెద్ద కూతురు రోజా 2023లో బంగ్లాదేశ్‌లో జన్మించింది. దానికి సంబంధించిన బర్త్ సర్టిఫికేట్ కూడా పోలీసులకు దొరికింది.
నిందితుల కోసం గాలింపు
మస్రూఫ్ ప్రస్తుతం సౌదీ అరేబియాలో డ్రైవర్‌గా పనిచేస్తున్నాడు. పోలీసుల దాడుల గురించి సమాచారం అందడంతో మహమూదా ఖాతూన్ తన పిల్లలతో కలిసి పరారీలో ఉంది. స్వాధీనం చేసుకున్న పత్రాలను పరిశీలిస్తున్నామని, భద్రతా కోణంలో మరియు ఫోర్జరీ కోణంలో కేసును దర్యాప్తు చేస్తున్నామని కోటవాలి ఇన్‌ఛార్జ్ దేవేంద్ర బిష్త్ తెలిపారు.