యష్, మయూర్ ఇద్దరూ ముంబై నుండి పూణేకు తెల్లవారుజామునే బయలుదేరారు. పూణేలో వారి స్నేహితుడు పుష్ప వారిని కలిశాడు. ముగ్గురూ కలిసి టిఫిన్ ముగించుకుని తమ ప్రయాణాన్ని కొనసాగించారు. ముంబై-గోవా హైవేకి బదులుగా, కొల్హాపూర్ మీదుగా గోవా వెళ్లాలని వారు నిర్ణయించుకున్నారు.
రాత్రి 9 గంటలకు వారు కొల్హాపూర్ చేరుకున్నారు. అక్కడ భోజనం ముగించిన తర్వాత, “ఈ రాత్రికి ఇక్కడే పడుకుని తెల్లవారుజామున బయలుదేరదాం” అని మయూర్, పుష్ప అన్నారు. కానీ యష్ దానికి ఒప్పుకోలేదు. “మీరు కావాలంటే కార్లోనే పడుకోండి, సమయం వృథా చేయడం ఎందుకు?” అని చెబుతూ యష్ డ్రైవింగ్ సీటులోకి కూర్చున్నాడు.
అంబోలి ఘాట్ మరియు ఆ వింత సంఘటన
చీకటి పడుతున్న కొద్దీ వాతావరణం భయంకరంగా మారుతోంది. అంబోలి ఘాట్ మలుపులన్నీ దాటి వారు కిందకు చేరుకున్నారు. ఇక అక్కడ నుండి కలంగుట్ బీచ్ కేవలం 50 కిలోమీటర్ల దూరంలో ఉంది. కానీ, సరిగ్గా అక్కడే వారి ప్రయాణం ఒక వింత మలుపు తిరిగింది.
యష్‌కు అర్ధరాత్రి వేళ అత్యవసరంగా మూత్ర విసర్జన రావడంతో, నిర్మానుష్యంగా ఉన్న అడవి ప్రాంతంలో కారు ఆపాడు. అక్కడ ఉన్న ఒక పెద్ద చింత చెట్టు కింద పని ముగించుకున్నాడు. ఆ సమయంలో అతనికి ఏదో వింత అనుభూతి కలిగింది, ఎవరో చూస్తున్నట్లు అనిపించింది. కానీ యష్ దానిని పట్టించుకోకుండా కారులో కూర్చున్నాడు. ఆ అజాగ్రత్తే అతనికి శాపమైంది.
ఒకే చోట తిరుగుతున్న కారు
కారు కొన్ని కిలోమీటర్లు ముందుకు వెళ్ళాక, రోడ్డుపై ఒక వింత మలుపు కనిపించింది. అది షార్ట్‌కట్ ఏమో అనుకుని యష్ కారును ఆ దారిలోకి మళ్లించాడు. అసలైన భయం అక్కడ మొదలైంది.
కొంతసేపటి తర్వాత యష్ ఒక విషయాన్ని గమనించాడు. ఆ రోడ్డుపై తన కారు తప్ప మరే వాహనం లేదు. స్నేహితులిద్దరూ గాఢ నిద్రలో ఉన్నారు. ఆశ్చర్యకరంగా.. తను ఏ చింత చెట్టు దగ్గరైతే కారు ఆపాడో, అదే చెట్టు మళ్లీ మళ్లీ కళ్లముందు కనిపిస్తోంది! యష్ కారు అదే దారిలో దాదాపు 20 నుండి 25 సార్లు గుండ్రంగా తిరిగింది. ఎంత ప్రయత్నించినా బయటకు వెళ్లే దారి దొరకలేదు. దీన్నే కొందరు ‘చక్వా’ (దారి తప్పించడం) అంటారు.
చివరకు ఒక గంట తర్వాత, అతనికి రోడ్డు పక్కన ఒక నది కనిపించింది. ఈసారి దారి గురించి ఆలోచించకుండా కారును నేరుగా నది వైపు పోనిచ్చాడు. నది దాటగానే ఆ వింత భ్రమ (చక్వా) తొలగిపోయింది. యష్‌కు ప్రాణం లేచి వచ్చినట్లయింది.
గోవాలో నాలుగు రోజులు ఎంజాయ్ చేసిన తర్వాత తిరిగి ముంబైకి బయలుదేరారు. కానీ, ఆనాటి భయంకర అనుభవంతో యష్ మళ్లీ కారు నడపడానికి ససేమిరా అన్నాడు.
గమనిక: ఈ కథ కేవలం కల్పితమా లేక యదార్థమా అనే దానిపై మేము ఎటువంటి వాదనలు చేయడం లేదు.