తమిళ చిత్ర పరిశ్రమలో ఇద్దరు అగ్ర నటుల కలయికలో రూపుదిద్దుకుంటున్న ప్రతిష్టాత్మక చిత్రం ‘ధర్మన్’ గురించి గత కొన్ని రోజులుగా సోషల్ మీడియాలో వస్తున్న ఊహాగానాలకు ఎట్టకేలకూ తెరపడింది. ఈ చిత్రంలో సూపర్ స్టార్ రజనీకాంత్ ఒక ప్రతిభావంతమైన వైద్యుడి (Doctor) పాత్రలో కనిపిస్తుండటంతో, ఈ సినిమా హాలీవుడ్ ప్రముఖ మెడికల్ సిరీస్ ‘ది గుడ్ డాక్టర్’ (The Good Doctor) కు అధికారిక రీమేక్ అనే ప్రచారం అంతర్జాలంలో జోరందుకుంది.
ఈ వార్త సినీ అభిమానుల మధ్య పెద్ద చర్చకు దారితీయడంతో, చిత్ర దర్శకుడు అశ్వత్ మరిముత్తు (Ashwath Marimuthu) స్వయంగా రంగంలోకి దిగి ఈ వదంతులకు ముగింపు పలికారు.
ఒక్క ముక్కలో స్పష్టం చేసిన దర్శకుడు:
ఈ రీమేక్ వార్తలపై తన అధికారిక ‘ఎక్స్’ (ట్విట్టర్) ఖాతా ద్వారా స్పందించిన దర్శకుడు.. ఇవన్నీ కేవలం పుకార్లేనని కొట్టిపారేశారు. ఈ ప్రచారమంతా అబద్ధమని స్పష్టం చేస్తూ ఆయన “Fake News!” అంటూ ఒకే ఒక్క ముక్కలో క్లారిటీ ఇచ్చారు.
ఖుషీ అవుతున్న రజనీ అభిమానులు:
దర్శకుడు ఇచ్చిన ఈ అధికారిక వివరణతో రజనీకాంత్ అభిమానులు హర్షం వ్యక్తం చేస్తున్నారు. ‘ధర్మన్’ చిత్రం ఎలాంటి రీమేక్ కాదని, ఇది పూర్తిగా ఒక సరికొత్త వైవిధ్యమైన కథాంశంతో కూడిన స్ట్రెయిట్ సబ్జెక్ట్ అని తేలిపోవడంతో, నెట్టింట ఈ సినిమాపై అంచనాలు మరింతగా పెరిగిపోయాయి.