కర్ణాటక: హాసన్ జిల్లాలో ఒక విషాదకర ఘటన చోటుచేసుకుంది. ప్రీ-వెడ్డింగ్ షూట్ కోసం కారులో వెళ్తున్న వరుడు, కారు నియంత్రణ తప్పి రోడ్డు పక్కన ఉన్న చెట్టును ఢీకొట్టడంతో అక్కడికక్కడే మరణించాడు. హాసన్ జిల్లా సకలేశపుర తాలూకా మూగలి గ్రామంలో ఈ ఉదయం ఈ ప్రమాదం జరిగింది.
మరణించిన దురదృష్టవంతుడైన యువకుడిని మను ఎల్.ఎన్. (29) గా గుర్తించారు. ఇతను బేలూరు తాలూకా లక్కుంద గ్రామంలోని దర్బార్ పేట నివాసి. మే 10వ తేదీన ఆలూరు తాలూకా తొగరనహళ్లి గ్రామానికి చెందిన కాంచనతో మను వివాహం నిశ్చయమైంది. ఆలూరు బైరాపుర రోడ్డులోని శ్రీ వీరశైవ కళ్యాణ మండపంలో వివాహ వేడుకకు అన్ని ఏర్పాట్లు జరిగాయి.
పెళ్లికి ఇరు కుటుంబాల్లో సన్నాహాలు ముమ్మరంగా సాగుతున్నాయి. ఈ క్రమంలో ఈ ఉదయం మను తన వితారా బ్రెజ్జా కారులో ప్రీ-వెడ్డింగ్ షూటింగ్ కోసం వధువును తీసుకురావడానికి ఒంటరిగా బయలుదేరారు. కారు సకలేశపుర తాలూకా మూగలి గ్రామం వద్దకు చేరుకోగానే నియంత్రణ తప్పి రోడ్డు పక్కన ఉన్న చెట్టును బలంగా ఢీకొట్టింది. ఈ ప్రమాదం ఎంత భీభత్సంగా జరిగిందంటే, కారు పూర్తిగా నుజ్జునుజ్జయ్యింది. మను అక్కడికక్కడే ప్రాణాలు విడిచారు.
ఇంకో కొద్ది రోజుల్లో కొడుకు పెళ్లి చేసి మురిసిపోవాల్సిన తల్లిదండ్రులు, కొడుకు ఆకస్మిక మరణవార్త విని షాక్కు గురయ్యారు. వారి ఆక్రందనలు మిన్నంటాయి. పెళ్లి సందడి నెలకొన్న ఆ ఇంట్లో ఇప్పుడు స్మశాన నిశ్శబ్దం అలుముకుంది. ఘటన స్థలానికి సకలేశపుర గ్రామీణ పోలీసులు చేరుకుని పరిశీలన జరిపారు. ఈ మేరకు కేసు నమోదు చేసుకుని దర్యాప్తు చేస్తున్నారు.