“హృదయాన్ని కలిచివేసే ఘటన..!” కదులుతున్న రైలులో ఒంటరిగా విలవిలలాడిన నెల రోజుల పసికందు.. సీసీటీవీ కెమెరాల ద్వారా ఆధారాలు సేకరిస్తున్న పోలీసులు.. రైలులో చిన్నారిని వదిలి వెళ్లిందెవరు..??

కన్యాకుమారి నుంచి మహారాష్ట్రలోని పుణె వైపు వెళ్తున్న ఎక్స్‌ప్రెస్ రైలు సేలం, ధర్మపురి జిల్లాల సరిహద్దు ప్రాంతాలను దాటుతూ ప్రయాణిస్తోంది.

ఆ రైలు చివరి భాగంలో ఉన్న జనరల్ బోగీ సీటులో పుట్టి నెల రోజులే అయిన ఓ ఆడ శిశువు చాలాసేపుగా ఎవరూ లేకుండా ఒంటరిగా పడి ఉంది.

తోటి ప్రయాణికులు ఇది గమనించి దగ్గరికి వెళ్లి చూడగా, ఆ చిన్నారి తమ బిడ్డ అని ఎవరూ ముందుకు రాకపోవడంతో తీవ్ర దిగ్భ్రాంతికి గురై వెంటనే రైల్వే పోలీసులకు సమాచారం అందించారు.

సమాచారం అందుకున్న బొమ్మిడి (Bommidi) పోలీసులు వెంటనే రైలు ఎక్కి ఆ ఆడ శిశువును సురక్షితంగా రక్షించి, సేలం రైల్వే స్టేషన్ అధికారులకు భద్రంగా అప్పగించారు.

చిన్నారిని రైలులో వదిలి వెళ్లిన వారు ఎవరు? ఎందుకు ఈ దారుణానికి ఒడిగట్టారు? అనే కోణంలో వివిధ రైల్వే స్టేషన్లలోని సీసీటీవీ కెమెరా దృశ్యాల ఆధారంగా పోలీసులు దర్యాప్తు ముమ్మరం చేశారు.