ఇంట్లో హెడ్ఫోన్స్ పెట్టుకుని చదువుకుంటున్న యువతిని, ఆమె తల్లి మరియు సోదరుడు మందలించిన వీడియో సోషల్ మీడియాలో వేగంగా వైరలవుతోంది.
కుటుంబ సభ్యుల మధ్య జరిగిన ఈ గొడవ నెట్టింట తీవ్ర చర్చకు దారితీసింది. ముఖ్యంగా ఆ అమ్మాయి ఇచ్చిన సమాధానాలపై నెటిజన్లు భిన్నాభిప్రాయాలను వ్యక్తం చేస్తున్నారు. ‘X’ (ట్విట్టర్) వేదికగా @Kritical_62 అనే వినియోగదారుడు ఈ వీడియోను పంచుకున్నారు. ఆ అమ్మాయితో ప్రవర్తించిన తీరు అంగీకరించదగ్గది కాదని, ఒకవేళ ఆమె ప్రియుడితో మాట్లాడుతున్నా అందులో తప్పేమీ లేదని ఆ పోస్ట్లో పేర్కొన్నారు.
హెడ్ఫోన్స్ కారణంగా మొదలైన గొడవ వీడియోలో, హెడ్ఫోన్స్ పెట్టుకుని కూర్చున్న అమ్మాయిని ఆమె సోదరుడు “ఏం చేస్తున్నావ్?” అని అడుగుతాడు. కొన్ని క్షణాల్లోనే అక్కడికి వచ్చిన తల్లి, ఆ యువతిని చెంపదెబ్బ కొట్టడం కనిపిస్తుంది. దీంతో ఇంట్లో తీవ్ర వాగ్వాదం మొదలైంది.
ఆ యువతి తాను చదువుకుంటున్నానని పుస్తకాలు కూడా చూపిస్తుంది. కానీ, ఇంటికి వచ్చినప్పుడు ఎన్నిసార్లు పిలిచినా పలకలేదని తల్లి ఆరోపిస్తుంది. హెడ్ఫోన్స్ పెట్టుకోవడం వల్ల పిలిచిన మాట వినిపించలేదని ఆ అమ్మాయి వివరణ ఇస్తుంది.
“నేను చదువుకుంటున్నాను కదా” వాగ్వాదం ముదరడంతో, ఆగ్రహించిన ఆ యువతి తన చేతిలో ఉన్న పుస్తకాన్ని గోడకేసి కొట్టి, “నేను చదువుకుంటున్నాను. అనవసరంగా నన్ను ఎందుకు విసిగిస్తున్నారు?” అని అరుస్తుంది. హెడ్ఫోన్స్ పెట్టుకుంటేనే తాను ఏకాగ్రతతో చదువుకోగలనని ఆమె చెబుతుంది. ఆ తర్వాత, వంట చేయలేదని తల్లి ప్రశ్నించగా, “మీ పనులు మీరే చేసుకోండి” అని ఆ అమ్మాయి సమాధానమిస్తుంది. దీంతో కోపం పట్టలేకపోయిన తల్లి, “ఇలాగే ఉంటే పెళ్లయ్యాక ఏమవుతుంది?” అని అనగా, “మీకు ఏమైందో అదే నాకూ అవుతుంది” అని ఆ అమ్మాయి ఎదురు సమాధానం చెప్పడం వీడియోలో ఉంది.
భిన్నమైన అభిప్రాయాలు ఈ మొత్తం ఘటనను ఆ అమ్మాయి సోదరుడే ఫోన్లో రికార్డ్ చేసినట్లు సమాచారం. ప్రస్తుతం ఈ వైరల్ వీడియోపై నెటిజన్లు భిన్నమైన అభిప్రాయాలను వ్యక్తం చేస్తున్నారు. కొందరు యువతికి మద్దతుగా మాట్లాడుతుంటే, మరికొందరు కుటుంబ సభ్యుల కోపంలోనూ అర్థం ఉందని అభిప్రాయపడుతున్నారు.