మీకు యూరిక్ యాసిడ్ ఎక్కువగా ఉండి, పప్పు తినడం పూర్తిగా మానేసి ఉంటే ఈ సమాచారం మీ కోసమే. సాధారణంగా యూరిక్ యాసిడ్ పెరిగినప్పుడు అన్ని పప్పులు హాని చేస్తాయని భావిస్తారు, కానీ నిపుణులు అది నిజం కాదని చెబుతున్నారు. సరైన రకాన్ని, సరైన మోతాదులో ఎంచుకుంటే పప్పులను కూడా డైట్‌లో చేర్చుకోవచ్చు.
శరీరంలో ప్యూరిన్లు (Purines) విచ్ఛిన్నమైనప్పుడు యూరిక్ యాసిడ్ ఉత్పత్తి అవుతుంది. ఇది కిడ్నీల ద్వారా బయటకు వెళ్లాలి. ఒకవేళ కిడ్నీలు దీనిని బయటకు పంపలేకపోతే రక్తంలో దీని స్థాయి పెరుగుతుంది (Hyperuricemia). దీనివల్ల కీళ్ల నొప్పులు, గౌట్ (Gout) మరియు కిడ్నీలో రాళ్లు ఏర్పడతాయి.
ఏ పప్పు ఎంత వరకు సురక్షితం?
- అత్యంత సురక్షితం: పెసర పప్పు (Moong Dal – Yellow). ఇందులో ప్యూరిన్ స్థాయిలు చాలా తక్కువ (25-35 mg). దీనిని పరిమితంగా ప్రతిరోజూ తీసుకోవచ్చు.
- పరిమితంగా తీసుకోవాల్సినవి: ఎర్ర కందిపప్పు (Masoor Dal), కందిపప్పు (Arhar Dal), పొట్టు పెసరపప్పు. వీటిలో ప్యూరిన్ 35-50 mg వరకు ఉంటుంది. వారానికి 3-4 సార్లు తీసుకోవచ్చు. అయితే వీటిని 6-8 గంటలు నానబెట్టి వండటం ముఖ్యం.
- తక్కువగా తీసుకోవాల్సినవి: అలసందలు (Lobia), ఉలవలు (Kulthi Dal). వీటిలో ప్యూరిన్ 60-75 mg వరకు ఉంటుంది. వారానికి 2-3 సార్లు మాత్రమే తీసుకోవాలి.
- దూరంగా ఉండాల్సినవి: శనగలు, రాజ్మా, నల్ల శనగలు. వీటిలో ప్యూరిన్ 75-90 mg వరకు ఉంటుంది. వీటిని 10-15 రోజులకు ఒకసారి మాత్రమే తీసుకోవాలి.
- పూర్తిగా నివారించాల్సినవి: సోయాబీన్ మరియు సోయా చంక్స్. వీటిలో ప్యూరిన్ అత్యధికంగా (120-140 mg) ఉంటుంది. యూరిక్ యాసిడ్ సమస్య ఉన్నవారు వీటిని పూర్తిగా మానేయాలి.