ఇరాన్-అమెరికా యుద్ధ అప్‌డేట్: మధ్యప్రాచ్యంలో కొనసాగుతున్న యుద్ధం కారణంగా ప్రపంచవ్యాప్తంగా చమురు, ఎల్‌పిజి (LPG) సరఫరాపై సంక్షోభం నెలకొంది. ఇరాన్ తన హోర్ముజ్ జలసంధిని పలు దేశాల నౌకల కోసం మూసివేయడంతో చమురు రవాణా నిలిచిపోయింది.
అయితే, భారత్‌ను తమ మిత్రదేశంగా పేర్కొంటూ ఇరాన్ కొన్ని భారతీయ నౌకలకు అనుమతినిస్తోంది. ఆదివారం నాడు ఎల్‌పిజితో నిండిన రెండు భారతీయ నౌకలు హోర్ముజ్ జలసంధిని దాటాయి. ఆ సమయంలో నౌకల్లోని నావికులు త్రివర్ణ పతాకాన్ని చేతబూని ‘భారత్ మాతా కీ జై’, ‘వందేమాతరం’ అంటూ నినాదాలు చేశారు.
సముద్రం గుండా ఈ ట్యాంకర్లు వెళ్తున్నప్పుడు భారత నౌకాదళం (Indian Navy) వీటికి రక్షణగా నిలిచింది. ఇందుకు సంబంధించి విడుదలైన వీడియోలు, ఫోటోల్లో నావికులు భారత నౌకాదళానికి కృతజ్ఞతలు తెలుపుతూ కనిపించారు. సుమారు 94,000 మెట్రిక్ టన్నుల వంటగ్యాస్‌తో వస్తున్న ఈ రెండు ట్యాంకర్లు హోర్ముజ్ జలసంధిని సురక్షితంగా దాటి భారత్ వైపు వస్తున్నాయని ప్రభుత్వం ఆదివారం వెల్లడించింది.
ఏప్రిల్ 1 నాటికి చేరుకోనున్న ట్యాంకర్లు: పెట్రోలియం మంత్రిత్వ శాఖ ఒక ప్రకటనలో ఈ నౌకలు – BW Tyr మరియు BW Elm – వరుసగా మార్చి 31న ముంబైకి, ఏప్రిల్ 1న న్యూ మంగళూరుకు చేరుకుంటాయని తెలిపింది. శత్రు దేశాల నౌకలను అనుమతించబోమని ఇరాన్ స్పష్టం చేసినప్పటికీ, మిత్ర దేశాల నౌకలు ఇరాన్ అధికారుల సమన్వయంతో ఈ మార్గం ద్వారా ప్రయాణించవచ్చని పేర్కొంది.
మరో 18 భారతీయ నౌకలు సిద్ధం: హోర్ముజ్ జలసంధిని సురక్షితంగా దాటిన తాజా నౌకల జాబితాలో ఇవి కూడా చేరాయి. ప్రస్తుతం వెస్ట్రన్ గల్ఫ్ ప్రాంతంలో 485 మంది భారతీయ నావికులతో కూడిన మొత్తం 18 భారతీయ నౌకలు ఉన్నాయని ప్రభుత్వం వెల్లడించింది. ప్రపంచంలోనే రెండో అతిపెద్ద ఎల్‌పిజి దిగుమతిదారు అయిన భారత్, తన అవసరాలలో 60% దిగుమతుల ద్వారానే తీర్చుకుంటుంది. ఇందులో 90% మధ్యప్రాచ్యం నుండే వస్తుంది. ప్రస్తుతానికి దేశంలోని అన్ని ఓడరేవుల్లో పనులు సాధారణంగానే జరుగుతున్నాయని ప్రభుత్వం స్పష్టం చేసింది.