వాషింగ్టన్: అందాన్ని మెరుగుపరుచుకోవడానికి ఇప్పుడు రకరకాల చికిత్సా పద్ధతులు అందుబాటులోకి వచ్చాయి. అలాంటి ఒక వింతైన పద్ధతే ఇప్పుడు అమెరికాలో ట్రెండ్‌గా మారుతోంది. మరణించిన వారి మృతదేహాల నుండి కొవ్వును సేకరించి, దానిని ఇంజక్షన్ల ద్వారా తమ శరీరంలోకి ఎక్కించుకోవడమే ఈ పద్ధతి. అత్యంత వింతైన, వివాదాస్పదమైన ఈ ట్రెండ్ ఇప్పుడు ఇంటర్నెట్‌లో చర్చనీయాంశమైంది.
అమెరికాలో మహిళలు తమ వక్షోజాలు, నడుము మరియు వెనుక భాగాలను అందంగా మార్చుకోవడానికి మరణించిన వారి శరీరం నుండి సేకరించిన కొవ్వును ‘ఫిల్లర్లు’ (Fillers) లాగా ఉపయోగిస్తున్నారు.
వింత చికిత్సా విధానం: అమెరికాలోని ఒక ప్రముఖ కాస్మెటిక్ సంస్థ దీనిని విక్రయిస్తోంది. అక్కడ నివసించే 34 ఏళ్ల ఒక ఫైనాన్స్ నిపుణురాలు తన శరీరాకృతిని మార్చుకోవడానికి ఈ ఫిల్లర్లను ఉపయోగించింది. ఈ చికిత్స కోసం ఒకేసారి దాదాపు ₹40 లక్షల వరకు ఖర్చు చేసినట్లు తెలుస్తోంది. ఈ ప్రక్రియ అక్కడ చట్టబద్ధంగానే జరుగుతోంది. దీని కోసం కఠినమైన నిబంధనలు ఉన్నాయని, తాము వాటిని పాటిస్తున్నామని ఆ సంస్థ పేర్కొంటోంది.
ఇది ఎలా జరుగుతుంది? మరణించిన తర్వాత తమ శరీరాలను వైద్య పరిశోధనల కోసం దానం చేసిన వారి కణజాలం నుండి ఈ కొవ్వును సేకరిస్తారు. ఆ తర్వాత దానిని క్రిమిరహితం చేసి, శుద్ధి చేస్తారు. సెల్యులార్ ఫ్యాట్ మ్యాట్రిక్స్‌లో భాగంగా దీనిలోని డీఎన్ఏ (DNA) మరియు సజీవ కణాలను తొలగిస్తారు.
సాధారణంగా శరీరంలో తగినంత కొవ్వు లేని వారు, లేదా బరువు తగ్గించే మందుల (Ozempic వంటివి) వల్ల ఆకృతి కోల్పోయిన వారు తమ శరీరాన్ని అందంగా మార్చుకోవడానికి దీనిని ఆశ్రయిస్తున్నారని ప్రముఖ ప్లాస్టిక్ సర్జన్ డారెన్ స్మిత్ పేర్కొన్నారు.
మత్తుమందు కూడా అవసరం లేదు: సాంప్రదాయ శస్త్రచికిత్సల మాదిరిగా కాకుండా, ఈ ప్రక్రియ చాలా సులభం. దీని కోసం అనస్థీషియా (మత్తుమందు) అవసరం లేదు. సాధారణ క్లినిక్‌లలోనే ఈ ఫిల్లర్లను శరీర భాగాల్లోకి ఇంజెక్ట్ చేస్తారు. ఆపరేషన్ అవసరం లేకపోవడం వల్లనే చాలా మంది దీనిని ఇష్టపడుతున్నారు.
ఖర్చు ఎంత? ఈ చికిత్స ఇప్పుడిప్పుడే ప్రాచుర్యం పొందుతుండటంతో దీని ధరలు చాలా ఎక్కువగా ఉన్నాయి. శరీరంలోకి ఎక్కించే ఫిల్లర్ల పరిమాణాన్ని బట్టి $10,000 నుండి $100,000 వరకు వసూలు చేస్తున్నారు. అంటే మన కరెన్సీలో దాదాపు ₹9 లక్షల నుండి ₹90 లక్షల వరకు ఖర్చవుతుంది.