సాధారణంగా ఒంటరిగా ఉన్న ఒకరిని చూస్తే, వారు ఏదో బాధలో ఉన్నారని లేదా వారికి ఎవరూ లేరని ఈ సమాజం భావిస్తుంటుంది.
కానీ, స్వయం సమృద్ధి, ఆత్మవిశ్వాసం ఉన్నవారికి ఒంటరితనం అనేది ఒక వరప్రసాదం. తము సంతోషంగా ఉండటానికి ఇతరుల తోడును ఆశించకుండా, తమ సమయాన్ని తామే ఆస్వాదించే ఒక కొత్త సంస్కృతి ప్రస్తుతం యువతలో విస్తరిస్తోంది. దీనికి నిదర్శనంగా, ముంబైకి చెందిన ఒక యువతి ఒంటరిగా ‘కాఫీ డేట్’ కి వెళ్లిన వీడియో సోషల్ మీడియాలో వైరల్ అవుతూ చాలా మంది దృష్టిని ఆకర్షించింది.
ఇన్స్టాగ్రామ్లో యాక్టివ్గా ఉండే నాన్సీ అనే ఆ యువతి, ఒక ఆదివారం నాడు బయటకు వెళ్లాలని ప్లాన్ చేసుకుంది. ఆ రోజు వాతావరణం కూడా చాలా ఆహ్లాదకరంగా ఉండటంతో, ఆమె తన స్నేహితులకు ఫోన్ చేసింది. కానీ, ఊహించని విధంగా స్నేహితులందరూ వారి పనుల్లో బిజీగా ఉండటం వల్ల ఎవరూ రాలేకపోయారు. దీంతో అప్సెట్ అయి, మొత్తం ఆదివారాన్ని బెడ్పైనే పడుకుని వృథా చేయడం ఆమెకు ఇష్టం లేదు. వెంటనే ఒక సంచలన నిర్ణయం తీసుకుంది.
ఎవరూ రాకపోతే ఏంటి? అనుకుంటూ తనకు నచ్చిన డ్రెస్ వేసుకుని, అందంగా తయారై ఒంటరిగానే కాఫీ డేట్కు బయలుదేరింది. ఒక మంచి కాఫీ షాప్కి వెళ్లి తనకు నచ్చిన కాఫీని ఆర్డర్ చేసి, దాని రుచిని ఆస్వాదిస్తూ నిదానంగా తాగింది. ఆ తర్వాత, చెవులకు హెడ్ఫోన్స్ పెట్టుకుని తనకు నచ్చిన పాటలు వింటూ ముంబై నగర వీధుల్లో సరదాగా చక్కర్లు కొట్టింది. ఇతరుల తోడు లేకపోయినా ఆ రోజంతటినీ తన కోసమే కేటాయించుకుని, ప్రతి క్షణాన్ని ఆనందంగా గడిపింది.
దీని గురించి నాన్సీ మాట్లాడుతూ, “నాకు కుటుంబంతో, స్నేహితులతో సమయం గడపడం ఇష్టమే. కానీ, వారు లేనప్పుడు నేను ఒంటరిగా సంతోషంగా ఉండలేనని దానికి అర్థం కాదు. మనిషి తనకు తానే స్నేహితుడిగా బతకడం నేర్చుకుంటే జీవితం మరింత సులభంగా, అందంగా మారుతుంది. నా సొంత తోడుతో నేను గడిపిన ఈ సమయానికి 10కి 10 మార్కులు ఇస్తాను” అని ఉద్వేగంగా పంచుకుంది. ఆత్మగౌరవాన్ని, ఆత్మవిశ్వాసాన్ని చాటిచెప్పే ఈ వీడియోపై నెటిజన్లు తమ ప్రశంసలు కురిపిస్తుండటంతో పాటు, తాము కూడా ఇలాగే ఒంటరిగా బయటకు వెళ్లి ఎంజాయ్ చేస్తుంటామని కామెంట్లు పెడుతున్నారు.