అణు బాంబు విస్ఫోటనం జరిగినప్పుడు మొదట తీవ్రమైన కాంతి, భీకరమైన వేడి మరియు శక్తి తరంగం ఉత్పన్నమవుతాయి. హిరోషిమాలో బాంబు పేలిన సమయంలో వెలువడిన వేడికి ప్రజలు నిలబడిన చోటే ఆవిరైపోయారు. అయితే, విస్ఫోటనం జరిగిన కేంద్రానికి దూరంగా ఉన్నవారికి అతిపెద్ద శత్రువు ‘రేడియేషన్’ (వికిరణం).
రేడియేషన్ గాలి ద్వారా కిలోమీటర్ల మేర వ్యాపించి మానవ శరీరంలోని కణాలను నాశనం చేస్తుంది. ఇది కంటికి కనిపించని మరణం. వెంటనే కాకపోయినా కొన్ని రోజులు లేదా నెలల తర్వాత మనిషిని నరకయాతన పెట్టి చంపేస్తుంది. అందుకే అణు దాడి సమయంలో ప్రాణాలు కాపాడుకోవడానికి కొన్ని సెకన్ల సమయం మాత్రమే ఉంటుంది, సరైన సమాచారమే ప్రాణాలను కాపాడుతుంది.
చాలామంది అణు విస్ఫోటనం చూడగానే దూరంగా పారిపోవడం సరైనదని భావిస్తారు, కానీ వాస్తవానికి అది ప్రాణాంతకం కావచ్చు. రేడియేషన్ తరంగాలు చాలా వేగంగా ఉంటాయి, కాబట్టి బయట పరుగెత్తే కంటే “లోపలికి వెళ్ళండి, లోపలే ఉండండి, సమాచారాన్ని తెలుసుకోండి” అనే సూత్రాన్ని పాటించాలి.
విస్ఫోటనం వార్త తెలియగానే ఇటుకలు లేదా కాంక్రీటుతో కట్టిన బలమైన భవనంలోకి వెళ్ళిపోండి. భవనంలో బేస్‌మెంట్ (నేలమాళిగ) ఉంటే అది అత్యంత సురక్షితమైన ప్రదేశం. కాంక్రీట్ గోడలు రేడియేషన్‌ను చాలా వరకు అడ్డుకోగలవు. కిటికీలు, తలుపులకు వీలైనంత దూరంగా ఉండండి, ఎందుకంటే గాజు పగిలి రేడియేషన్ లోపలికి వచ్చే ప్రమాదం అక్కడే ఎక్కువగా ఉంటుంది.
ఒకవేళ విస్ఫోటనం సమయంలో మీరు బయట ఉండి, ఆ తర్వాత సురక్షిత ప్రాంతానికి చేరుకుంటే, మొదట మీ పై బట్టలను విప్పేయండి. రేడియోధార్మిక కణాలు ధూళిలా మీ బట్టలకు అంటుకుని ఉంటాయి. ఆ బట్టలను వెంటనే తీసి ఒక ప్లాస్టిక్ బ్యాగులో పెట్టి సీల్ చేయండి. ఆ బ్యాగును మనుషులు లేదా జంతువులు వెళ్లలేని మూలలో ఉంచండి.
ఆ తర్వాత గోరువెచ్చని నీరు, సబ్బుతో శుభ్రంగా స్నానం చేయండి. చర్మాన్ని మరీ గట్టిగా రుద్దకండి, ఎందుకంటే గాయాల ద్వారా రేడియేషన్ కణాలు శరీరంలోకి వెళ్లే అవకాశం ఉంది. కళ్లు, ముక్కు, చెవులను తడి గుడ్డతో తుడుచుకోండి. ఈ ప్రక్రియ మీ శరీరంపై ఉన్న 90% రేడియేషన్‌ను తగ్గిస్తుంది.
రేడియేషన్ నుండి తప్పించుకోవడానికి గాలి సంబంధాన్ని తగ్గించడం చాలా ముఖ్యం. ఇంటి కిటికీలు, తలుపులన్నీ మూసివేయండి. బయటి గాలిని లోపలికి లాగే ఏసీలు, ఫ్యాన్లు లేదా హీటర్లను ఆపివేయండి. కనీసం 24 నుండి 48 గంటల వరకు ఇంటి లోపలే ఉండాలి, ఎందుకంటే మొదటి 24 గంటల్లో రేడియేషన్ స్థాయి అత్యంత ప్రమాదకరంగా ఉంటుంది.