ధర్మశాల: ధర్మశాలలో ప్రశాంతంగా గడపాలనుకున్న నోయిడాకు చెందిన ఒక కుటుంబానికి హయత్ రీజెన్సీ హోటల్ ఒక భయంకరమైన అనుభవాన్ని మిగిల్చింది. ఈ లగ్జరీ హోటల్లో బస చేస్తున్న సమయంలో పెద్ద భద్రతా లోపం జరిగిందని దివ్య త్యాగి అనే మహిళ ఆరోపించారు.
ఏం జరిగింది? రాత్రికి దాదాపు రూ. 80,000 చెల్లించి ఆ హోటల్లో బస చేస్తున్నట్లు దివ్య త్యాగి తెలిపారు. తన ఇన్స్టాగ్రామ్ ఖాతాలో పోస్ట్ చేసిన వీడియోలో, అర్ధరాత్రి సమయంలో ఒక గుర్తు తెలియని వ్యక్తి తన గది తలుపులను బాదడం ప్రారంభించాడని ఆమె పేర్కొన్నారు. ఆ హఠాత్పరిణామానికి ఆమె భయంతో వణికిపోయారు. తన భర్త తలుపులోని ‘పీ హోల్’ (peephole) ద్వారా చూడగా, బయట ఒక వ్యక్తి అర్థనగ్నంగా కనిపించాడని ఆమె తెలిపారు.
భద్రతా లోపం: దంపతులు వెంటనే ఎమర్జెన్సీ బటన్ను నొక్కారు. ఆ ఆగంతకుడి చేతిలో వెండి రంగులో ఉన్న ఒక పదునైన వస్తువు ఉందని దివ్య ఆరోపించారు. కాసేపటికి అక్కడికి వచ్చిన సెక్యూరిటీ గార్డు, ఆ వ్యక్తిని హోటల్ ప్రాంగణం నుంచి బయటకు తీసుకెళ్లారు.
హోటల్ భద్రతపై ఆందోళన: ఈ ఘటన హోటల్ భద్రత మరియు అతిథుల ప్రైవసీపై తీవ్ర ప్రశ్నలను లేవనెత్తింది. ఈ ఆరోపణలపై హోటల్ యాజమాన్యం ఇప్పటివరకు ఎటువంటి బహిరంగ ప్రకటన చేయలేదు. ఈ ఘటన ఎప్పుడు జరిగిందో స్పష్టమైన తేదీ, సమయం తెలియదు. ఈ మహిళ చేసిన ఆరోపణల యొక్క ప్రామాణికతను ‘ఫ్రీ ప్రెస్ జర్నల్’ ధృవీకరించలేదు.
పోలీసు ఫిర్యాదు చేశారా? ఈ ఘటనపై బాధితురాలు పోలీసులకు ఫిర్యాదు చేశారో లేదో ఇంకా స్పష్టత లేదు. దివ్య త్యాగి తన ఇన్స్టాగ్రామ్ ఖాతాలో మూడు భాగాలుగా ఈ ఘటనను వివరించారు. ఈ వీడియోలకు వేల సంఖ్యలో వ్యూస్ వచ్చాయి.