ప్రపంచవ్యాప్తంగా ఐసిస్ (ISIS) ఉగ్రవాద సంస్థలో రెండవ అత్యున్నత కమాండర్ అయిన అబూ-బిలాల్ అల్-మినుకిని అమెరికా, నైజీరియా బలగాలు ఉమ్మడి ఆపరేషన్లో విజయవంతంగా మట్టుబెట్టాయని అమెరికా అధ్యక్షుడు డోనాల్డ్ ట్రంప్ ఆదివారం ప్రకటించారు.
ఈ ప్రత్యేక సైనిక చర్య ఆఫ్రికా ఖండంలో జరిగిందని తెలిపిన ట్రంప్, ఈ ఆపరేషన్ వల్ల ఐసిస్ అంతర్జాతీయ నెట్వర్క్ పూర్తిగా బలహీనపడిందని పేర్కొన్నారు. ఈ ఆపరేషన్కు సహకరించినందుకు నైజీరియా ప్రభుత్వానికి ఆయన కృతజ్ఞతలు తెలిపారు.
ట్రంప్ ఏమన్నారంటే?
తన సొంత సోషల్ మీడియా వేదిక ‘ట్రూత్ సోషల్’ (Truth Social) లో ట్రంప్ స్పందిస్తూ.. తన ఆదేశాల మేరకే అమెరికా సైన్యం, నైజీరియా సాయుధ బలగాలతో కలిసి ఈ ఆపరేషన్ నిర్వహించిందని వెల్లడించారు.
“ఈ రాత్రి, నా నిర్దేశంలో.. ధైర్యసాహసాలు కలిగిన అమెరికా బలగాలు, నైజీరియా సాయుధ బలగాలతో కలిసి అత్యంత పక్కా ప్రణాళికతో, సంక్లిష్టమైన మిషన్ను అద్భుతంగా పూర్తి చేశాయి. ప్రపంచంలోనే అత్యంత చురుకైన ఉగ్రవాదిని యుద్ధభూమి నుండి శాశ్వతంగా తుడిచిపెట్టాయి” అని ట్రంప్ రాసుకొచ్చారు.
అబూ-బిలాల్ అల్-మినుకి ఆఫ్రికాలో దాక్కొని సురక్షితంగా ఉండవచ్చని భావించాడని, అయితే అమెరికా నిఘా వర్గాలు అతని ప్రతి కదలికను నిరంతరం పర్యవేక్షించాయని ఆయన తెలిపారు.
“ప్రపంచవ్యాప్తంగా ఐసిస్ సంస్థలో నంబర్ 2 స్థానంలో ఉన్న అబూ-బిలాల్ అల్-మినుకి, తాను ఆఫ్రికాలో దాక్కోవచ్చని అనుకున్నాడు. కానీ అతని కార్యకలాపాలపై మాకు ఎప్పటికప్పుడు సమాచారం అందించే బలమైన నిఘా వర్గాలు మాకున్నాయనే విషయం అతనికి తెలియదు” అని ట్రంప్ అన్నారు.
ఈ ఐసిస్ అగ్రనేత ఇకపై “ఆఫ్రికా ప్రజలను భయభ్రాంతులకు గురిచేయలేడని” లేదా అమెరికన్లపై దాడులకు ప్రణాళికలు వేయలేడని ట్రంప్ స్పష్టం చేశారు.
“అతడి నిర్మూలనతో ఐసిస్ అంతర్జాతీయ కార్యకలాపాలు చాలా వరకు కుంచించుకుపోయాయి. ఈ ఆపరేషన్లో భాగస్వామ్యమైనందుకు నైజీరియా ప్రభుత్వానికి ధన్యవాదాలు. గాడ్ బ్లెస్ అమెరికా!” అని అమెరికా అధ్యక్షుడు జోడించారు.
ఎవరు ఈ అబూ-బిలాల్ అల్-మినుకి?
ఆఫ్రికాలోని సాహెల్ (Sahel) ప్రాంతంలో ఐసిస్ ఉగ్రవాద కార్యకలాపాలకు నాయకత్వం వహించిన సీనియర్ నేత ‘అబూ బకర్ ఇబ్న్ ముహమ్మద్ ఇబ్న్ అలీ అల్-మైనుకి’కి ఉన్న మరొక పేరే ఈ ‘అబూ-బిలాల్ అల్-మినుకి’ అని భావిస్తున్నారు.
అమెరికా రికార్డుల ప్రకారం.. ఇతడు ఐసిస్ యొక్క ‘జనరల్ డైరెక్టరేట్ ఆఫ్ ప్రావిన్సెస్’తో సంబంధాలు కలిగి ఉన్నాడు. ఇతనికి అబూ బిలాల్ అల్-మినుకి, అబూబకర్ మైనోక్, అబోర్ మైనోక్ వంటి పలు మారుపేర్లు (Aliases) ఉన్నాయి.
అమెరికా విదేశాంగ శాఖ (US State Department) ఇతడిని 2023లోనే అంతర్జాతీయ సీనియర్ ఐసిస్ లీడర్గా అధికారికంగా ప్రకటించింది.
సాహెల్ ప్రాంతంలో జరిగిన అనేక ఉగ్రవాద దాడులలో ఇతడు కీలక పాత్ర పోషించాడని, ఐసిస్ అంతర్జాతీయ నిర్మాణంలో అత్యంత ముఖ్యమైన వ్యక్తిగా పరిగణించబడ్డాడని నివేదికలు పేర్కొన్నాయి.