వెల్లూరు: తమిళనాడులోని వెల్లూరులో ఒక యువతి కోసం జరిగిన హత్య స్థానికంగా పెను సంచలనం సృష్టించింది. గత రెండు రోజులుగా కలకలం రేపుతున్న ఈ ఘటనపై పోలీసులు లోతైన విచారణ జరుపుతున్నారు. ఈ కేసులో స్నేహితుల మధ్య ఏం జరిగింది? ఆ అమ్మాయి ఎవరు? అనే విషయాలు ఇక్కడ చూడవచ్చు.
తిరువణ్ణామలై జిల్లా ఆరణికి చెందిన డాని వలన్ అరసు (19) వెల్లూరులోని ఒక ప్రైవేట్ కళాశాలలో బీఏ ద్వితీయ సంవత్సరం చదువుతున్నాడు. కాలేజీ సమీపంలోని సాయినాథపురంలో స్నేహితులతో కలిసి అద్దె ఇంట్లో ఉండేవాడు. సెమెస్టర్ సెలవులకు అందరూ ఊరికి వెళ్లగా, డాని మాత్రం డిసెంబర్ 31 రాత్రి ఒంటరిగా వెల్లూరుకు వచ్చాడు. ఆ తర్వాత అతను తన తల్లిదండ్రులకు ఫోన్ చేయకపోవడం, సెల్ ఫోన్ స్విచ్ ఆఫ్ రావడంతో వారికి అనుమానం కలిగింది.
స్నేహితుడి ప్రేయసిపై మనసు పడటంతో..
తల్లిదండ్రుల ఫిర్యాదుతో పోలీసులు విచారణ చేపట్టగా, డాని స్నేహితుడు కిషోర్ కన్నన్ ప్రవర్తనపై అనుమానం వచ్చింది. విచారణలో అసలు విషయం బయటపడింది. డాని మరియు అతని స్నేహితులు ఒకే అమ్మాయిని ప్రేమించడంతో వారి మధ్య గత కొంతకాలంగా గొడవలు జరుగుతున్నాయి. ఆ కక్షతోనే డానిని అంతమొందించాలని స్నేహితులు ప్లాన్ చేశారు.
నూతన సంవత్సర వేడుకల్లో భాగంగా అందరూ కలిసి మద్యం సేవించారు. మత్తులో ఉన్న డానిని ఇనుప రాడ్డుతో కొట్టి, గొంతు నులిమి హత్య చేసినట్లు పోలీసులు నిర్ధారించారు. ఎవరికీ అనుమానం రాకుండా ఉండేందుకు దీనిని ప్రమాదంగా చిత్రీకరించాలని చూశారు. శవాన్ని బైక్‌పై సుమారు 12 కిలోమీటర్ల దూరంలోని తమిళనాడు-ఆంధ్ర సరిహద్దులోని సిత్తబావి కొండల వద్ద పడేశారు.
అబద్ధపు వాంగ్మూలం
పోలీసుల ప్రాథమిక విచారణలో కిషోర్ కన్నన్ పొంతన లేని సమాధానాలు చెప్పాడు. జనవరి 1వ తేదీ రాత్రి తాను, పార్థసారథి కలిసి అద్దె ఇంటికి వెళ్లేసరికి డాని రక్తపు మడుగులో ప్రాణాలతో కొట్టుమిట్టాడుతున్నాడని, “నన్ను నలుగురు కొట్టారు, నేను బతకను.. ఈ విషయం మా ఇంట్లో చెప్పకండి” అని చెప్పి చనిపోయాడని కట్టుకథ అల్లాడు. శవం మీద కేసు రాకూడదనే భయంతో తాము కొండల్లో పడేశామని చెప్పాడు. అయితే పోలీసులు తమదైన శైలిలో విచారించగా, తామే హత్య చేసినట్లు కిషోర్ ఒప్పుకున్నాడు.
ప్రేమ కోసం స్నేహానికి ద్రోహం
పుదుచ్చేరికి చెందిన పార్థసారథి తనతో పాటు చదివే ఒక యువతిని ప్రేమిస్తున్నాడు. అయితే డాని కూడా అదే యువతిని ఇష్టపడి, ఆమె వెంటపడటం మొదలుపెట్టాడు. తన స్నేహితుడు ప్రేమిస్తున్న అమ్మాయిని నువ్వు కోరుకోవడం తప్పు అని పార్థసారథి, కిషోర్ కలిసి డానిని హెచ్చరించారు. అయినప్పటికీ డాని తన పద్ధతి మార్చుకోకపోవడంతో అతడిని మట్టుబెట్టాలని నిర్ణయించుకున్నారు.
ప్రస్తుతం కిషోర్ కన్నన్‌ను పోలీసులు అరెస్టు చేసి వెల్లూరు జైలుకు తరలించారు. ఈ కేసులో ప్రధాన నిందితుడైన పార్థసారథి పరారీలో ఉన్నాడు. అతని కోసం ప్రత్యేక పోలీస్ బృందాలు పుదుచ్చేరిలో గాలిస్తున్నాయి.