అనుమానంతో జరిగిన దారుణం..! భార్యపై అనుమానం.. సొంత తమ్ముడిలా భావించిన బంధువును హత్య చేసిన భర్త..! ఇద్దరి మధ్య అక్రమ సంబంధం ఉందని అనుమానం.. చివరికి ఏం జరిగిందంటే..?!

ఉత్తరప్రదేశ్‌లోని గోరఖ్‌పూర్ జిల్లా బాన్స్‌గావ్ ప్రాంతంలో శివమ్ అలియాస్ శుభమ్ మిశ్రా హత్య కేసులో షాకింగ్ విషయాలు వెలుగులోకి వచ్చాయి.

పోలీసుల దర్యాప్తు ప్రకారం.. శివమ్‌కు, తన భార్యకు మధ్య అక్రమ సంబంధం ఉందనే అనుమానం శివమ్ బంధువు సంతోష్ మిశ్రాకు కలిగింది. ఈ అనుమానంతోనే శివమ్‌ను హత్య చేసినట్లు పోలీసులు వెల్లడించారు.

సెప్టెంబర్ 17న శివమ్‌పై ఇనుప ఆయుధంతో దాడి జరిగినట్లు పోలీసులు తెలిపారు. అతని తలపై పలుమార్లు తీవ్రంగా దాడి చేయడంతో అక్కడికక్కడే మృతి చెందినట్లు పేర్కొన్నారు.

తొలుత ఈ హత్యపై గుర్తుతెలియని వ్యక్తిపై కేసు నమోదు చేసిన పోలీసులు.. నిందితుడిని గుర్తించేందుకు దర్యాప్తు ముమ్మరం చేశారు.

దర్యాప్తులో భాగంగా 50కి పైగా సీసీటీవీ కెమెరాల ఫుటేజీలను పరిశీలించారు. అలాగే సుమారు 300 మొబైల్ నంబర్ల కాల్ డేటాను విశ్లేషించారు. పోలీసులకు లభించిన సమాచారంతో సంతోష్ మిశ్రా కదలికలపై నిఘా పెట్టారు.

ఆ తర్వాత సంతోష్‌ను పోలీసులు అదుపులోకి తీసుకుని విచారించగా.. కేసుకు సంబంధించిన కీలక విషయాలు వెలుగులోకి వచ్చినట్లు తెలిపారు.

నిందితుడి వద్ద నుంచి హత్యకు ఉపయోగించినట్లు చెబుతున్న ఇనుప ఆయుధం, రక్తపు మరకలు ఉన్న బనియన్, మొబైల్ ఫోన్‌ను పోలీసులు స్వాధీనం చేసుకున్నారు.

తన భార్య శివమ్‌తో తరచూ మాట్లాడటం, అతనితో సన్నిహితంగా ఉండటం సంతోష్‌లో అనుమానాలకు కారణమైనట్లు పోలీసులు తెలిపారు. ఆ అనుమానమే చివరకు హత్యకు దారితీసినట్లు పోలీసులు చెబుతున్నారు.

అయితే.. శివమ్‌కు, సంతోష్ భార్యకు నిజంగా అక్రమ సంబంధం ఉందా లేదా అనే అంశంపై పోలీసులు ఇంకా దర్యాప్తు కొనసాగిస్తున్నారు.