గురుగ్రామ్: నగరాల్లో ప్రజలు ఎంత బిజీ అయిపోయారంటే, ప్రతి చిన్న పనికి యాప్‌ల మీద ఆధారపడుతున్నారు. తాజాగా ఒక మహిళ తన ఇంటి చెత్తను పారవేయడానికి రాపిడో రైడర్‌ను ఉపయోగించుకున్న వింత ఘటన ఇంటర్నెట్‌లో చర్చనీయాంశమైంది.
అసలేం జరిగిందంటే? వైరల్ అవుతున్న వీడియోలో ఒక మహిళ పెద్ద కార్డ్‌బోర్డ్ బాక్స్‌ను రైడర్ చేతికి ఇస్తుంది. ఆ రైడర్ ఎంతో బాధ్యతగా “మేడమ్, పేమెంట్ ఆన్‌లైన్ చేశారా లేదా నగదు ఇవ్వాలా?” అని అడుగుతాడు. ఆమె ఇప్పటికే ఆన్‌లైన్ పేమెంట్ చేశానని చెప్పి అతడిని పంపిస్తుంది. అది ఏదో విలువైన పార్శిల్ అని భావించిన రైడర్, యాప్‌లో ఉన్న లొకేషన్‌కు వెళ్తాడు.
లొకేషన్‌లో అసలైన ట్విస్ట్! రైడర్ డ్రాప్ లొకేషన్‌కు చేరుకోగానే అక్కడ ఏ ఆఫీసు లేదా వ్యక్తి లేరు. దానికి బదులుగా అక్కడ పెద్ద చెత్త కుప్ప ఉంది. అయోమయంలో పడ్డ రైడర్ వెంటనే ఆ మహిళకు ఫోన్ చేసి “మేడమ్, ఇక్కడ పార్శిల్ తీసుకోవడానికి ఎవరూ లేరు, ఎవరికి ఇవ్వాలి?” అని అడుగుతాడు. అప్పుడు ఆ మహిళ చాలా సింపుల్‌గా, “అన్నా.. దాన్ని అక్కడే పడేయండి, అదంతా చెత్తే!” అని సమాధానం ఇస్తుంది.
నవ్వాలో.. ఏడవాలో..! ఆ మాట వినగానే రైడర్‌కు ఏం చేయాలో పాలుపోలేదు. “చూడండి మనం ఎక్కడికి చేరుకున్నామో.. ఇప్పుడు ప్రజల చెత్తను డెలివరీ చేసే స్థాయికి వచ్చేసాం” అని కెమెరా ముందు నవ్వుతూనే తన బాధను చెప్పుకున్నాడు. డెలివరీ చేయడానికి వెళ్లిన వాడికి చెత్త కుప్పను చూపిస్తే మనసు ఎలా విలవిల్లాడుతుందో అని అతడు ఆవేదన వ్యక్తం చేశాడు.
నెటిజన్ల స్పందన: ఈ వీడియోపై నెటిజన్లు రకరకాలుగా స్పందిస్తున్నారు. ఇది సోమరితనానికి పరాకాష్ట అని, పేద రైడర్లను ఇలా అవమానించడం సరికాదని కొందరు ఆగ్రహం వ్యక్తం చేస్తున్నారు. మరికొందరేమో “ఇది క్రియేటివ్ థింకింగ్.. చెత్త బండి రానప్పుడు దీనికంటే బెస్ట్ ఐడియా మరొకటి లేదు” అని జోకులు పేలుస్తున్నారు.