ఏలాంటి వారసత్వ ఆస్తి లేకుండా, కేవలం ఒక సాధారణ ఐటీ ఉద్యోగంతో ఒక వ్యక్తి ఎలా కోట్ల రూపాయలు సంపాదించాడో వివరిస్తూ పెట్టిన పోస్ట్ ప్రస్తుతం సోషల్ మీడియాలో వైరల్ అవుతోంది. నెలకు కేవలం ₹25,000 జీతంతో మొదలుపెట్టి, నేడు ₹9 కోట్లకు అధిపతిగా ఎదిగిన ఆ వ్యక్తి ప్రయాణం అందరినీ ఆశ్చర్యపరుస్తోంది.
ఆ ప్రయాణం సాగిందిలా: ప్రస్తుతం 47 ఏళ్ల వయసున్న ఈ భారతీయ ఐటీ ఉద్యోగి, తనకు ఎలాంటి అదనపు ఆదాయం గానీ, విదేశీ డాలర్ల జీతం గానీ లేదని స్పష్టం చేశారు. కేవలం తన పొదుపు, పెట్టుబడి మంత్రంతోనే ఈ స్థాయికి చేరానని చెప్పారు.
- 2005లో ప్రారంభం: ఏడాదికి ₹3 లక్షల జీతంతో (నెలకు ₹25 వేలు) కెరీర్ మొదలుపెట్టారు. ఆ సమయంలో ఆయన వద్ద ఎలాంటి ఆస్తి లేదు.
- పెట్టుబడిపై దృష్టి: మొదటి నుంచీ ఆయన స్టాక్ మార్కెట్‌లో క్రమబద్ధంగా పెట్టుబడి పెట్టడం అలవాటు చేసుకున్నారు.
సంపద వృద్ధి చెందిన తీరు: ఆయన ఎదుగుదలను గమనిస్తే ‘కాంపౌండింగ్’ (చక్రవడ్డీ) పవర్ అర్థమవుతుంది:
- 2010: జీతం ₹10 లక్షలు – పెట్టుబడుల విలువ ₹10 లక్షలు.
- 2016: జీతం ₹25 లక్షలు – పెట్టుబడులు ₹1 కోటి దాటాయి. (మొదటి కోటి సంపాదించడానికి 11 ఏళ్లు పట్టింది).
- 2020: జీతం ₹35 లక్షలు – పెట్టుబడులు రెట్టింపు అయ్యి ₹2 కోట్లకు చేరాయి.
- 2025: ప్రస్తుతం ఆయన జీతం ₹65 లక్షలు కాగా, ఆయన నికర ఆస్తి విలువ ఏకంగా ₹9 కోట్లు.
ఆయన సక్సెస్ సీక్రెట్స్:
- కాంపౌండింగ్ మ్యాజిక్: పెట్టుబడి పెట్టిన తొలి రోజుల్లో వృద్ధి నెమ్మదిగా ఉన్నా, సమయం గడిచేకొద్దీ అది ఊహించని వేగంతో పెరిగింది.
- రియల్ ఎస్టేట్ జోలికి వెళ్లలేదు: నివసించడానికి ఒక స్వంత ఇల్లు తప్ప, ఆయన అదనపు ప్లాట్లు లేదా పొలాల మీద పెట్టుబడి పెట్టలేదు. ఫిక్స్‌డ్ డిపాజిట్లు (FD) కూడా చేయలేదు.
- స్టాక్ మార్కెట్ నమ్మకం: ఆయన మొత్తం ఆస్తిలో ₹8 కోట్లు భారతీయ షేర్లలో, ₹1 కోటి మ్యూచువల్ ఫండ్లలో ఉంది.
- సాధారణ జీవనం: ఐదుగురు సభ్యులున్న కుటుంబంలో తానొక్కడే సంపాదనపరుడైనప్పటికీ, విలాసాలకు దూరంగా ఉంటూ క్రమం తప్పకుండా పొదుపు చేశారు.