వాషింగ్టన్: ఇజ్రాయెల్ – ఇరాన్ మధ్య ఉద్రిక్తతలు ఇంకా కొనసాగుతున్న తరుణంలో, అమెరికా అధ్యక్షుడు డోనాల్డ్ ట్రంప్కు ఊహించని విధంగా ఒక కొత్త సమస్య వచ్చి పడింది. అమెరికాలోని ప్రధాన చమురు నిల్వ కేంద్రాలలో ముడి చమురు (Crude Oil) నిల్వలు గణనీయంగా పడిపోయాయి. ఇది దేశీయంగా చమురు ఉత్పత్తి మరియు సరఫరాపై తీవ్ర ప్రభావం చూపే అవకాశం ఉందని నిపుణులు హెచ్చరిస్తున్నారు.
అమెరికాలోనే అతిపెద్ద వాణిజ్య చమురు నిల్వ కేంద్రమైన ఓక్లహోమాలోని ‘కుషింగ్’ (Cushing) లో ముడి చమురు నిల్వలు గత వారం 1.6 మిలియన్ బారెల్స్ తగ్గి, కేవలం 20 మిలియన్ బారెల్స్కు పడిపోయాయి. 2014 తర్వాత చమురు నిల్వలు ఈ స్థాయిలో పడిపోవడం ఇదే మొదటిసారి. గత ఎనిమిది వారాలుగా ఇక్కడ నిల్వలు నిరంతరాయంగా తగ్గుతూ వస్తుండగా, మొత్తం మీద 8.3 మిలియన్ బారెల్స్ మేర క్షీణత నమోదైంది.
అమెరికాలో ముడి చమురు ధరలను నిర్ణయించడంలో కుషింగ్ కేంద్రం కీలక పాత్ర పోషిస్తుంది. ప్రస్తుతం ఇక్కడ ఉన్న నిల్వలు అమెరికా మొత్తం ముడి చమురు ఉత్పత్తిలో కనీసం రెండు రోజులకు కూడా సరిపోవు.
చమురు నిల్వలు 20 మిలియన్ బారెల్స్ కంటే తగ్గితే ఏమవుతుంది?
కుషింగ్ కేంద్రంలో చమురు నిల్వలు 20 మిలియన్ బారెల్స్ కంటే తగ్గితే, రిఫైనరీల కొరకు పైప్లైన్ల ద్వారా ముడి చమురును బయటకు తీయడం సాంకేతికంగా అత్యంత కఠినంగా మరియు ఖర్చుతో కూడుకున్నదిగా మారుతుంది. అంతేకాకుండా, చమురు అడుగుభాగానికి చేరుకోవడం వల్ల అందులో నీరు, మట్టి (వండలి) కలిసి నాణ్యత దెబ్బతినే ప్రమాదం ఉంది. ఇది అమెరికా చమురు సరఫరా వ్యవస్థను నేరుగా దెబ్బతీస్తుంది.
1983 తర్వాత అత్యంత కనిష్ట స్థాయికి..
మరోవైపు, అమెరికా యొక్క వ్యూహాత్మక చమురు నిల్వలు (Strategic Petroleum Reserve – SPR) ప్రస్తుతం సుమారు 340 మిలియన్ బారెల్స్ వద్ద ఉన్నాయి. ఇది 1983 తర్వాత నమోదైన అత్యంత కనిష్ట స్థాయి. యుద్ధ వాతావరణం కారణంగా ఇంధన ధరల పెరుగుదలను నియంత్రించడానికి, గతంలో అమెరికా ఏకంగా 172 మిలియన్ బారెల్స్ చమురును మార్కెట్లోకి విడుదల చేయడమే ఈ భారీ క్షీణతకు ప్రధాన కారణం.
ఈ రెండు ప్రధాన చమురు నిల్వలు ఒకేసారి పడిపోవడం అనేది అమెరికా మార్కెట్లో అత్యంత అరుదైన పరిస్థితి. ఇది ఆ దేశ ఆర్థిక వ్యవస్థను కోలుకోలేని దెబ్బతీసే అవకాశం ఉందని చమురు రంగ నిపుణులు విశ్లేషిస్తున్నారు.
ట్రంప్ ప్రభుత్వానికి కొత్త సవాలు:
ఇజ్రాయెల్ – ఇరాన్ మధ్య ఉద్రిక్తతలు నిరంతరం పెరుగుతున్న తరుణంలో, అమెరికా ఎదుర్కొంటున్న ఈ అంతర్గత చమురు సంక్షోభం ట్రంప్ యంత్రాంగానికి పెద్ద సవాలుగా మారింది. ఈ సంక్షోభాన్ని అధిగమించడానికి మరియు అంతర్జాతీయ మార్కెట్లో చమురు ధరలు పెరగకుండా నియంత్రించడానికి, ఇరాన్తో యుద్ధ వాతావరణాన్ని త్వరగా ముగించాలని ట్రంప్ భావిస్తున్నారు.
ఇలాంటి క్లిష్ట పరిస్థితుల్లో అమెరికా పూర్తి స్థాయి యుద్ధంలోకి దిగడం ఆ దేశ ఆర్థిక వ్యవస్థకు ఏమాత్రం మంచిది కాదు. అందువల్ల ఇరాన్తో శాంతియుతంగా చర్చలు జరపడమే సరైన మార్గమని ట్రంప్ ఒక నిర్ణయానికి వచ్చారు.
కానీ, ఇజ్రాయెల్ మాత్రం అమెరికా పరిస్థితిని గమనించి అటు ఇరాన్కు, ఇటు అమెరికాకు ఒకేసారి ఒత్తిడిని కలిగిస్తోంది. ఇజ్రాయెల్ దక్షిణ లెబనాన్పై దాడులు కొనసాగిస్తుండటంతో, ఇరాన్ శాంతి చర్చలకు రావడానికి నిరాకరిస్తోంది. దీనివల్ల అటు యుద్ధం ముగియడం లేదు, ఇటు ముడి చమురు సరఫరా కూడా పునరుద్ధరించబడటం లేదు.