అమెరికాలో ఏలియన్స్ ఉన్నారనే వార్తలు చాలా కాలంగా మీడియాలో వినిపిస్తూనే ఉన్నాయి. అయితే తాజాగా అమెరికా మాజీ అధ్యక్షుడు బరాక్ ఒబామా ఏలియన్స్‌పై ఒక పెద్ద విషయాన్ని వెల్లడించారు.
2009 నుండి 2017 వరకు అమెరికా అధ్యక్షుడిగా ఉన్న ఒబామా, సుమారు 9 ఏళ్ల తర్వాత ఏలియన్స్ గురించి కీలక వ్యాఖ్యలు చేశారు. ఆయన అభిప్రాయం ప్రకారం, “భూమి వెలుపల జీవం ఉండే అవకాశం ఉంది”. అయితే, అమెరికా ప్రభుత్వం ఏలియన్స్‌ను రహస్యంగా దాచి ఉంచిందన్న వార్తలను ఆయన తోసిపుచ్చారు.
జర్నలిస్ట్ బ్రయాన్ టైలర్ కోహెన్‌కు ఇచ్చిన ఇంటర్వ్యూలో UFOలు మరియు మానవేతర జీవుల గురించి అడిగిన ప్రశ్నకు ఒబామా సమాధానమిస్తూ.. ఏలియన్స్ నిజమని పేర్కొన్నారు. అయితే, తాను స్వయంగా ఎప్పుడూ ఏలియన్స్‌ను చూడలేదని వెంటనే స్పష్టం చేశారు. ‘ఏరియా 51’ (Area 51)లో ఏలియన్స్‌ను ఉంచలేదని, అలాంటి రహస్య అండర్‌గ్రౌండ్ సౌకర్యాలు ఏవీ లేవని ఆయన చెప్పారు. ఒకవేళ అలాంటిది ఏదైనా ఉంటే, అది అమెరికా అధ్యక్షుడికి కూడా తెలియకుండా దాచిన అతిపెద్ద కుట్ర అవుతుందని ఆయన వ్యాఖ్యానించారు.
UFOలపై ప్రశ్నలు: చాలా కాలంగా ‘ఏరియా 51’ చుట్టూ అనేక రహస్య కథనాలు ప్రచారంలో ఉన్నాయి. 1947లో రోస్‌వెల్‌లో కూలిపోయిన ఏలియన్ నౌక శకలాలను ఇక్కడే దాచారని కొందరు నమ్ముతారు. కానీ అమెరికా ప్రభుత్వం దీనిని ఎప్పుడూ ధృవీకరించలేదు. ఇటీవల వీటిని UAP (Unidentified Anomalous Phenomena) అని పిలుస్తున్నారు. 2021లో పెంటాగన్ విడుదల చేసిన కొన్ని వీడియోలలో ఆకాశంలో వేగంగా ప్రయాణించే వింత వస్తువులు కనిపించినా, అవి ఏమిటో స్పష్టంగా గుర్తించలేదని ప్రభుత్వం అంగీకరించింది.