సేలం: రక్షణ కల్పిస్తారని నమ్మి వెళ్తే.. ఆ పోలీసు అధికారి పరిస్థితి ఇలా మారుతుందని ఆయన కలగన్నైనా ఊహించి ఉండరు. ఒక నకిలీ మహిళా లాయర్ నవ్వులకు, తియ్యటి మాటలకు పడిపోయి.. చివరికి ఆమెపైనే ఫిర్యాదు చేయడానికి పోలీస్ స్టేషన్‌కు పరుగులు తీశారో ఎస్సై. ఇంతకీ ఎవరీ అలమేలు? అసలేం జరిగింది?
పక్కా ప్లాన్‌తో వేట
సేలం జిల్లా పూసారిపట్టికి చెందిన అలమేలు (25) అనే వివాహితకు, ఓమలూరు సమీపంలోని ఆర్‌.సి.శెట్టిపట్టికి చెందిన జనార్దనన్, జనహంసప్రియన్ అనే సోదరులతో పరిచయం ఏర్పడింది. వీరు ముగ్గురూ కలిసి సులభంగా డబ్బు సంపాదించాలని ఒక ప్రమాదకరమైన పథకం వేశారు.
ఓమలూరు పరిసర ప్రాంతాల్లోని ప్రముఖ విఐపిలు, ప్రభుత్వ ఉద్యోగులు, వ్యాపారవేత్తల సెల్ ఫోన్ నంబర్లను సేకరించి, అలమేలుతో వారికి ఫోన్ చేయించేవారు. ఆమె తన మాటలతో వారిని ఆకర్షించి, స్నేహం నటించి, నమ్మకం కుదిరాక రకరకాల కారణాలతో డబ్బులు వసూలు చేయడం మొదలుపెట్టింది.
అసభ్య వీడియోలతో బెదిరింపులు
డబ్బులు ఇచ్చిన వారు తిరిగి అడిగినప్పుడు, వారిని తన ఇంటికి పిలిచేది. ఆమె మాటలు నమ్మి ఇంటికి వెళ్లిన వారిని, అక్కడ మాటు వేసిన గ్యాంగ్ సభ్యులు బంధించి, బట్టలు విప్పదీసి బలవంతంగా అసభ్య వీడియోలు తీసేవారు. ఆ వీడియోలను సోషల్ మీడియాలో పెడతామని బెదిరించి లక్షలాది రూపాయలు వసూలు చేసేవారు. పరువు పోతుందనే భయంతో చాలా మంది ప్రముఖులు పోలీసులకు ఫిర్యాదు చేయకుండా ఆమె అడిగినంత ఇచ్చుకున్నారు.
ఎస్సై బూపతి ఎలా చిక్కారు?
ఈ ముఠా వలలో చివరగా చిక్కుకున్నది ఓమలూరు పోలీస్ స్టేషన్ సబ్ ఇన్‌స్పెక్టర్ బూపతి (32). ఒక హత్య కేసుకు సంబంధించి విచారణ చేస్తున్న సమయంలో ‘లాయర్’ అని చెప్పుకుంటూ అలమేలు ఆయనకు పరిచయమైంది. కేసు విషయంలో తరచూ మాట్లాడుతూ ఎస్సైకి దగ్గరైన అలమేలు, అత్యవసరమని చెప్పి ఆయన వద్ద రూ. 92,000 అప్పు తీసుకుంది.
ఆ డబ్బు తిరిగి అడిగినప్పుడు ఇద్దరి మధ్య గొడవ జరిగింది. డబ్బుకు బదులుగా కొత్త సెల్ ఫోన్ ఇస్తానని చెప్పి బూపతిని తన ఇంటికి పిలిచింది. ఆయన అక్కడికి వెళ్లినప్పుడు ఇద్దరూ ఏకాంతంగా ఉన్న సమయంలో, ఆమె స్నేహితులు రహస్యంగా వీడియో తీశారు. ఆ తర్వాత బూపతి మెడలోని 3 తులాల బంగారు గొలుసు, జి-పే ద్వారా రూ. 27,000 లాక్కొని ఆయన్ని కొట్టి తరిమేశారు.
ఐదుగురి అరెస్ట్ – గుండా చట్టం నమోదు
జరిగిన అవమానాన్ని భరించలేక, తనలాగా ఇంకెవరూ మోసపోకూడదని బూపతి దీవట్టిపట్టి పోలీసులకు ఫిర్యాదు చేశారు. పోలీసులు రంగంలోకి దిగి అలమేలుతో పాటు ఆమె అనుచరులు వీరవళవన్, చెల్లా, తిరుమాల్ అళగన్, ప్రవీణ్ కుమార్‌లను అరెస్ట్ చేశారు.
ఈ కేసు తీవ్రతను పరిగణనలోకి తీసుకున్న జిల్లా కలెక్టర్ బృందాదేవి, ప్రధాన నిందితురాలు అలమేలుపై ‘గుండా చట్టం’ (Goondas Act) కింద చర్యలు తీసుకోవాలని ఆదేశించారు. అప్పటికే ముగ్గురు అనుచరులపై ఈ చట్టం ప్రయోగించగా, ఇప్పుడు అలమేలు కూడా అదే చట్టం కింద జైలు శిక్ష అనుభవిస్తోంది.
ట్విస్ట్: అందరినీ లాయర్ అని నమ్మించిన అలమేలు.. అసలు లాయరే కాదట! ఆమె చదివింది కేవలం ఇంటర్మీడియట్ (12వ తరగతి) వరకు మాత్రమేనని తేలింది.