అయ్యో దారుణం..! నిద్రపోవడానికి వేరే స్థలమే దొరకలేదా..? నడిరోడ్డుపై కారు ఆపి గాఢనిద్రలోకి జారుకున్న వ్యక్తి.. అతడిని లేపేసరికి తలప్రాణం తోకకొచ్చింది.. విచిత్రమైన వీడియో!

కేరళలో నడిరోడ్డుపై కారు ఆపేసి, లోపల సీట్లో ఒక యువకుడు గాఢ నిద్రపోయిన ఘటన స్థానికంగా తీవ్ర కలకలం రేపింది.

రహదారి మధ్యలో చాలా సేపటి నుండి కారు నిలిచి ఉండటాన్ని చూసిన తోటి వాహనదారులు తీవ్ర ఆశ్చర్యానికి గురయ్యారు. దీనివల్ల ఆ మార్గంలో ట్రాఫిక్‌కు తీవ్ర అంతరాయం ఏర్పడింది. కారు లోపల ఒక వ్యక్తి ఉండటాన్ని గమనించిన స్థానికులు, అసలు అతడు కారును నడిరోడ్డుపై ఎందుకు ఆపాడో అర్థంకాక అయోమయానికి గురయ్యారు. అనంతరం ఈ ఘటనపై పోలీసులకు సమాచారం అందించారు. సమాచారం అందిన వెంటనే పోలీసులు సంఘటనా స్థలానికి చేరుకున్నారు.

అక్కడికి చేరుకున్న పోలీసులు నడిరోడ్డుపై నిలిపి ఉన్న కారును పరిశీలించి లోపలికి చూడగా, ఒక యువకుడు గుర్రుపెట్టి గాఢ నిద్రలో ఉండటం కనిపించింది. రోడ్డుపై వాహనాలు రయ్‌రయ్‌మని వెళ్తున్నప్పటికీ, ఏమాత్రం బెరుకు లేకుండా కారులో అతను నిద్రపోతున్న తీరు అక్కడున్న వారిని విస్తుపోయేలా చేసింది. ఎట్టకేలకు పోలీసులు అతడిని నిద్రలేపి, కారును రోడ్డు పక్కకు తీయించారు. ఈ విచిత్ర ఘటనతో ఆ ప్రాంతంలో కాసేపు గందరగోళ పరిస్థితి నెలకొంది.

డ్రైవింగ్ చేసే సమయంలో నిద్రమత్తు రావడం అత్యంత ప్రమాదకరమని, డ్రైవర్లు అప్రమత్తంగా ఉండాలని పోలీసులు సూచించారు. సుదీర్ఘ ప్రయాణాల్లో అలసట లేదా నిద్ర వచ్చినప్పుడు సురక్షితమైన ప్రదేశంలో వాహనాన్ని నిలిపి విశ్రాంతి తీసుకోవడమే సరైన పద్ధతి అని అధికారులు తెలిపారు. అయితే ఈ ఘటనలో సేఫ్ జోన్ చూసుకోకుండా నడిరోడ్డుపైనే కారును ఆపేయడం తీవ్ర ఆందోళన కలిగించింది. అదృష్టవశాత్తూ ఎలాంటి ప్రమాదం జరగకపోవడంతో అందరూ ఊపిరి పీల్చుకున్నారు.

ఈ ఘటనకు సంబంధించిన వీడియో ప్రస్తుతం సోషల్ మీడియాలో వైరల్ అవుతోంది. నడిరోడ్డుపై కారు నిలిచి ఉండటం, పోలీసులు వచ్చి అతడిని లేపడం చూసిన నెటిజన్లు రకరకాలుగా స్పందిస్తున్నారు. “నిద్ర వచ్చినప్పుడు డ్రైవింగ్ చేయకుండా కారు ఆపడం మంచిదే కానీ, నడిరోడ్డుపై కాకుండా కాస్త పక్కకు ఆపాల్సింది” అని కొందరు కామెంట్లు పెడుతున్నారు. ఏది ఏమైనా, కేరళలో జరిగిన ఈ వింత ఘటన ప్రస్తుతం నెట్టింట హాట్ టాపిక్‌గా మారింది.