బెంగళూరుకు చెందిన ఒక ప్రయాణికుడు డిజిటల్ చెల్లింపుల సమయంలో చేసిన చిన్న పొరపాటు అతనికి పెద్ద షాక్ ఇచ్చింది.
ఏం జరిగింది?
గత జనవరి 14వ తేదీ రాత్రి, ఒక ప్రయాణికుడు బనశంకరి నుండి కదిరేనహల్లికి BMTC బస్సులో ప్రయాణించారు. టికెట్ ధర కేవలం 6 రూపాయలు మాత్రమే. అయితే, ఆ ప్రయాణికుడు UPI ద్వారా నగదు చెల్లించే సమయంలో అజాగ్రత్తగా 62,316 రూపాయలను పంపించేశారు.
నగదు బదిలీ అయినట్లు మెసేజ్ చూసుకున్న తర్వాతే తాను చేసిన పొరపాటును గుర్తించి ఆ ప్రయాణికుడు హతాశుడయ్యారు. వెంటనే కండక్టర్‌కు విషయం తెలియజేయగా, డబ్బు BMTC ఖాతాకు చేరినట్లు కండక్టర్ ధృవీకరించారు. అయితే, నిబంధనల ప్రకారం అంత పెద్ద మొత్తాన్ని వెంటనే వెనక్కి ఇచ్చే అధికారం కండక్టర్‌కు లేకపోవడంతో, డిపో మేనేజర్‌ను సంప్రదించాలని సూచించారు.
అధికారుల స్పందన:
ఈ ఘటనపై BMTC అధికారులు స్పందిస్తూ.. సాంకేతిక విచారణ మరియు తనిఖీల తర్వాత ఆ నగదును త్వరలోనే సదరు ప్రయాణికుడికి తిరిగి అందజేస్తామని హామీ ఇచ్చారు.