అయ్యో..! వెనక్కి చూసి కూడా వాహనాన్ని తిప్పలేదా.? పెళ్లి బస్సుకు యముడిగా మారిన స్కూటర్.. పెట్రోల్ బంక్ దగ్గర భయానక ప్రమాదం.. తృటిలో తప్పిన ప్రాణాలు.. వైరల్‌గా మారిన వీడియో..!!

కేరళలోని ఎర్నాకుళం జిల్లా కూత్తాట్టుకుళం సమీపంలో పెళ్లి వేడుకకు వెళ్తున్న ఓ టూరిస్ట్ బస్సు అనూహ్యంగా అదుపుతప్పి పెట్రోల్ బంక్‌లోకి దూసుకెళ్లి బోల్తా పడింది.

అదృష్టవశాత్తూ బస్సు పెట్రోల్ బంక్‌లోని ఇంధన యంత్రాలను ఢీకొట్టలేదు. అదే జరిగి ఉంటే భారీ పేలుడు సంభవించే ప్రమాదం ఉండేది.

కూత్తాట్టుకుళం–పిరవం ప్రధాన రహదారిపై సుమారు 35 మంది ప్రయాణికులతో బస్సు వెళ్తోంది. ఆ సమయంలో వర్షం పడుతుండటంతో రహదారి మొత్తం తడిగా ఉంది. బస్సు ముందు వెళ్తున్న స్కూటర్‌ వాహనదారుడు ఎలాంటి సిగ్నల్ ఇవ్వకుండా, వెనుక నుంచి వాహనాలు వస్తున్నాయా లేదా అన్నది గమనించకుండా ఒక్కసారిగా కుడివైపు మలుపు తిప్పాడు.

ఊహించని విధంగా స్కూటర్‌ మలుపు తిప్పడంతో బస్సు డ్రైవర్‌కు పరిస్థితిని అదుపు చేసేందుకు కనీసం కొన్ని సెకన్ల సమయం కూడా దొరకలేదు. స్కూటర్‌ వాహనదారుడి ప్రాణాలను కాపాడేందుకు ప్రయత్నించిన బస్సు డ్రైవర్‌ వెంటనే బ్రేక్ వేసి, స్టీరింగ్‌ను కుడివైపు తిప్పాడు.

అయితే అప్పటికే రహదారి తడిగా ఉండటంతో బస్సు టైర్లు జారి అదుపుతప్పాయి. దీంతో బస్సు బోల్తా పడుతూ కొంత దూరం జారుకుంటూ వెళ్లి, నేరుగా సమీపంలోని పెట్రోల్ బంక్‌లోకి దూసుకెళ్లింది. ఈ సమయంలో బస్సు వెనుక భాగం స్కూటర్‌ను స్వల్పంగా తాకుతూ వెళ్లింది.

ఈ ప్రమాదానికి సంబంధించిన సీసీటీవీ దృశ్యాలు సోషల్ మీడియా ప్లాట్‌ఫామ్ ‘ఎక్స్‌’లో వైరల్‌గా మారాయి. ఆ వీడియోలో స్కూటర్‌ ఒక్కసారిగా మలుపు తిప్పడం, దాన్ని తప్పించేందుకు బస్సు డ్రైవర్‌ తీవ్రంగా ప్రయత్నించడం, చివరకు బస్సు బోల్తా పడటం స్పష్టంగా కనిపిస్తోంది.

పెట్రోల్ బంక్ వద్ద ఉన్న బలమైన సిమెంట్‌ రక్షణ గోడ లేకపోయి ఉంటే పరిస్థితి మరింత భయానకంగా మారేది. బస్సు నేరుగా ఇంధన యంత్రాలను, అక్కడ పెట్రోల్‌ పోయించుకుంటున్న కారును ఢీకొట్టే అవకాశం ఉండేది. అదే సమయంలో బంక్‌లో నిలిపి ఉన్న మరో స్కూటర్‌ వాహనదారుడు కూడా తృటిలో ప్రాణాపాయం నుంచి బయటపడ్డాడు.

ఈ ప్రమాదంలో బస్సులో ప్రయాణిస్తున్న మహిళలు, చిన్నారులు, వృద్ధులు సహా సుమారు 20 నుంచి 35 మంది వరకు గాయపడినట్లు సమాచారం. వెంటనే స్థానికులు అక్కడికి చేరుకుని సహాయక చర్యలు చేపట్టారు. బస్సులో చిక్కుకున్న వారిని బయటకు తీసి అంబులెన్స్‌ల ద్వారా కూత్తాట్టుకుళంలోని మూడు ప్రైవేట్ ఆసుపత్రులకు తరలించారు.

గాయపడిన వారిలో ఎక్కువ మంది పరిస్థితి నిలకడగా ఉన్నట్లు తెలుస్తోంది. అయితే 3 నుంచి 4 మందికి మాత్రం కొంత తీవ్రంగా గాయాలైనట్లు సమాచారం. ఈ ప్రమాదంలో ఎలాంటి ప్రాణనష్టం జరగకపోవడం అందరికీ భారీ ఊరటనిచ్చింది.

ప్రమాదానికి సంబంధించిన వీడియో సోషల్ మీడియాలో వైరల్‌ అయిన తర్వాత దీనిపై తీవ్ర చర్చ జరుగుతోంది. స్కూటర్‌ వాహనదారుడిని ఢీకొట్టకుండా అతని ప్రాణాలను కాపాడేందుకు ప్రయత్నిస్తూ, తనతో పాటు బస్సులోని ప్రయాణికుల ప్రాణాలను కూడా ప్రమాదంలోకి నెట్టినప్పటికీ సమయస్ఫూర్తితో వ్యవహరించిన బస్సు డ్రైవర్‌ను కొందరు ప్రశంసిస్తున్నారు.

అదే సమయంలో ఎలాంటి ముందస్తు సిగ్నల్‌ ఇవ్వకుండా, వెనుక నుంచి వస్తున్న వాహనాలను గమనించకుండా స్కూటర్‌ను అకస్మాత్తుగా మలుపు తిప్పడం వల్లే ఇంత పెద్ద ప్రమాదం జరిగిందని పలువురు ఆగ్రహం వ్యక్తం చేస్తున్నారు.