వివాహ బంధం అనేది నమ్మకం పునాదులపై నిర్మితమయ్యే పవిత్ర కలయిక. అయితే, ఆ నమ్మకాన్నే సమూలంగా కూల్చేసేలా.. పెళ్లయిన కేవలం 45 రోజులకే ఓ భర్తకు ఎదురైన వింత అనుభవం ప్రస్తుతం దేశవ్యాప్తంగా తీవ్ర చర్చనీయాంశంగా మారింది.
తన భార్య గర్భవతి అని తెలుసుకుని, తనను మోసం చేశారంటూ ఫిర్యాదు చేసేందుకు భర్త ఆమెను తీసుకుని పోలీస్ స్టేషన్‌కు వెళ్లగా.. అక్కడే పోలీస్ స్టేషన్ ఆవరణలోనే ఆమె పండంటి బిడ్డకు జన్మనిచ్చిన విచిత్ర ఘటన అందరినీ విస్తుపోయేలా చేసింది.
పెళ్లయిన కొద్ది రోజులకే భార్య శరీరంలో వచ్చిన శారీరక మార్పులను గమనించిన భర్త అనుమానం వచ్చి ఆమెను ప్రశ్నించాడు. అయితే ఆమె నుంచి సరైన సమాధానం రాకపోవడంతో, తనను నిలువునా మోసం చేసి పెళ్లి చేశారని ఆరోపిస్తూ న్యాయం కోసం భార్యను వెంటబెట్టుకుని పోలీస్ స్టేషన్‌ను ఆశ్రయించాడు.
పోలీసు అధికారుల ఎదుట భర్త తన గోడును వెళ్లబోసుకుంటున్న సమయంలోనే, ఆ మహిళకు అకస్మాత్తుగా తీవ్రమైన ప్రసవ నొప్పులు మొదలయ్యాయి. పరిస్థితి తీవ్రతను గమనించిన పోలీస్ సిబ్బంది ఏమాత్రం ఆలస్యం చేయకుండా మహిళా కానిస్టేబుళ్ల సహకారంతో వెంటనే స్పందించగా.. ఆ మహిళ పోలీస్ స్టేషన్ ప్రాంగణంలోనే బిడ్డను ప్రసవించింది.
పోలీస్ స్టేషనే కాన్పుల గదిగా మారిన ఈ అనూహ్య పరిణామాన్ని చూసి అవాక్కయిన భర్త, అతని కుటుంబ సభ్యులు.. “పెళ్లయి కేవలం 45 రోజులే అయింది, అప్పుడే బిడ్డ పుట్టడమేంటి? పెళ్లికి ముందే ఈమె వేరొకరి వల్ల గర్భం దాల్చింది” అంటూ అక్కడే తీవ్ర ఆగ్రహం వ్యక్తం చేస్తూ వాగ్వాదానికి దిగారు.
తమను మోసగించి ఈ వివాహం జరిపించారంటూ భర్త బంధువులు తీవ్ర ఆరోపణలు చేయడంతో, పోలీసులు ముందుగా తల్లీబిడ్డలను సురక్షితంగా ఆసుపత్రికి తరలించారు. అనంతరం ఈ విచిత్ర వివాహ మోసం వ్యవహారంలో అసలు వాస్తవాలను వెలికితీసేందుకు పోలీసులు సమగ్ర విచారణ చేపట్టారు.