ఉత్తరప్రదేశ్‌లో అర్ధరాత్రి వేళ ఓ ఇంట్లోకి చొరబడిన 6 నుంచి 8 మంది దుండగుల ముఠా, కుటుంబం మొత్తాన్ని బందీలుగా చేసి దాదాపు గంటన్నర పాటు దోపిడీకి పాల్పడిన ఘటన తీవ్ర కలకలం రేపింది.
తుపాకులు, ఇతర మారణాయుధాలు చూపి కుటుంబ సభ్యులను బెదిరించిన దుండగులు.. ఇంట్లోని బంగారు ఆభరణాలు, నగదు సహా విలువైన వస్తువులను ఊడ్చుకెళ్లారు. ఒక్కసారిగా జరిగిన ఈ దారుణంతో బాధితులు తీవ్ర భయాందోళనలకు గురయ్యారు. ఈ ఘటనతో స్థానికంగా తీవ్ర భయానక వాతావరణం నెలకొంది.
అర్ధరాత్రి సుమారు 2 గంటల సమయంలో కుటుంబ సభ్యులు గాఢ నిద్రలో ఉండగా, వారికి ఊపిరాడనట్లు అనిపించింది. గమనించగా ఏసీ (ఎయిర్ కండీషనర్) డక్ట్ ద్వారా గదిలోకి పొగ వస్తున్నట్లు గుర్తించారు. దీంతో కంగారుపడి తలుపు తెరవగానే, బయట కాపుకాసిన 6 నుంచి 8 మంది సభ్యుల ముఠా ఒక్కసారిగా లోపలికి చొరబడింది. కుటుంబ సభ్యులను తమ ఆధీనంలోకి తీసుకున్న దోపిడీదారులు ఇల్లంతా సోదాలు చేయడం మొదలుపెట్టారు.
పిల్లలను చంపేస్తామని బెదిరించిన దుండగులు, కుటుంబ యజమాని చేతులు, కాళ్లను గుడ్డలతో కట్టేశారు. అందరినీ ఒక మూల కూర్చోబెట్టి, ఇద్దరు దుండగులు వారిపై తుపాకులు ఎక్కుపెట్టారు. మిగిలినవారు ఇంట్లోని వస్తువులను జల్లెడ పట్టారు. మహిళ ఒంటిపై ఉన్న బంగారు నగలను బలవంతంగా లాక్కోవడమే కాకుండా, బ్యాగుల్లో ఉన్న నగదు, బీరువాలోని ఆభరణాలు, డబ్బును దోచుకెళ్లారు.
దాదాపు గంటన్నర పాటు ఇంట్లోనే తిష్టవేసి దోపిడీ సాగించిన ముఠా ఆ తర్వాత పరారైంది. సమాచారం అందుకున్న వెంటనే ఉన్నతాధికారులు ఘటనా స్థలానికి చేరుకుని దర్యాప్తు చేపట్టారు. దీనిపై కేసు నమోదు చేసిన పోలీసులు, నిందితులను పట్టుకునేందుకు 5 ప్రత్యేక బృందాలను రంగంలోకి దించారు. సమీప ప్రాంతాల్లోని సీసీటీవీ ఫుటేజీలను పరిశీలిస్తూ దుండగుల ఆచూకీ కోసం గాలింపు ముమ్మరం చేశారు.