ఉత్తరప్రదేశ్ రాష్ట్రం సహారన్పూర్లో, కాలేజీ క్లర్క్ మరియు జిమ్ యజమాని అయిన దేవ్దత్ శర్మ (52) అనే వ్యక్తి తన్ను తాను కాల్చుకుని ఆత్మహత్య చేసుకున్న సంఘటన ఆ ప్రాంతంలో తీవ్ర దిగ్భ్రాంతిని కలిగించింది.
సర్సావా ప్రాంతంలో నివసిస్తున్న దేవ్దత్ శర్మ, బాలాజీ గ్రూప్ కాలేజీలో క్లర్క్గా పనిచేస్తూనే, గత 26 ఏళ్లుగా ‘రాక్ జిమ్’ కూడా నడుపుతున్నారు. ఎప్పటిలాగే శనివారం సాయంత్రం కాలేజీ, జిమ్ పనులు ముగించుకుని ఇంటికి తిరిగి వచ్చిన ఆయన, రాత్రి భోజనం చేసిన తర్వాత తన గదిలో నాటు తుపాకీతో గుండెల్లో కాల్చుకుని ఆత్మహత్య చేసుకున్నారు. తుపాకీ శబ్దం విని పరుగెత్తుకు వచ్చిన ఆయన భార్య సీమా రాణి మరియు పొరుగువారు, ఆయనను రక్షించి ప్రభుత్వ వైద్య కళాశాలకు తరలించారు. అక్కడ ఆయనను పరీక్షించిన వైద్యులు ఆయన అప్పటికే మరణించినట్లు తెలిపారు.
ఆత్మహత్య చేసుకునే కొన్ని నిమిషాల ముందు, దేవ్దత్ శర్మ తన కోడలు నేహా శర్మకు పంపిన వాట్సాప్ సందేశం పోలీసుల విచారణకు కీలక ఆధారంగా మారింది. ఆ సందేశంలో ఆయన పేర్కొన్నదేమిటంటే, ఇకపై ఈ అవమానాన్ని నేను తట్టుకోలేను. రోజురోజుకూ చనిపోవడం కంటే ఒకేసారి చనిపోవడం మేలు. నా మృతదేహాన్ని నా భార్య సీమా రాణి తాకకూడదు. నా అంత్యక్రియల కోసం కట్టెలను ఉపయోగించవద్దు, దానికి ఎక్కువ డబ్బు కూడా ఖర్చు చేయవద్దు. నా ఆత్మ శాంతించకుండా ఎలాంటి మతపరమైన కర్మలు చేయకూడదు; నా ఆత్మ అలాగే తిరగాలని కోరుకుంటున్నాను. నా తల్లిని జాగ్రత్తగా చూసుకోండి అని ఉద్వేగభరితంగా పేర్కొన్నారు.
దేవ్దత్ శర్మకు భార్య, ఇద్దరు కుమారులు ఉన్నారు. పెద్ద కుమారుడు అభిషేక్ విదేశాల్లో ఉద్యోగం చేస్తున్నాడు. చిన్న కుమారుడు ఆదిత్య చండీగఢ్లో ఫోరెన్సిక్ సైన్స్ అభ్యసిస్తుండటంతో పాటు, జాతీయ స్థాయి స్వర్ణ పతకం సాధించిన పవర్ లిఫ్టర్.
సంఘటన గురించి సమాచారం అందగానే, పోలీస్ సూపరింటెండెంట్ పవన్ కుమార్, పోలీస్ స్టేషన్ ఇన్ఛార్జ్ ప్రవేశ్ కుమార్ శర్మ మరియు ఫోరెన్సిక్ నిపుణుల బృందం హుటాహుటిన వచ్చి ఆధారాలను సేకరించాయి. అలాగే నాటు తుపాకీని స్వాధీనం చేసుకున్నాయి. దీనిపై పోలీసు వర్గాలు మాట్లాడుతూ, “తొలిదశ విచారణలో ఇది ఆత్మహత్య అని ధృవీకరించబడింది. కోడలికి పంపిన వాట్సాప్ సందేశం, ఆత్మహత్య లేఖపై తీవ్రంగా విచారణ జరుపుతున్నాం. కుటుంబ సభ్యులను, పొరుగువారిని నిరంతరం విచారిస్తున్నాం” అని తెలిపారు.
Leave a Reply