మాస్కో: రష్యా అధ్యక్షుడు వ్లాదిమిర్ పుతిన్ వ్యక్తిగత జీవితం ఎప్పుడూ అత్యంత రహస్యంగా ఉంటుంది. అయితే, ఆయనకు సంబంధించిన ప్రేమ వ్యవహారాలు తరచూ వార్తల్లో నిలుస్తూనే ఉంటాయి. తాజాగా, 73 ఏళ్ల పుతిన్ తాను ప్రేమలో ఉన్నట్లు మొదటిసారిగా ధృవీకరించారు. ఒక ఇంటర్వ్యూలో అడిగిన ప్రశ్నకు ఆయన నేరుగా ‘యస్’ అని సమాధానం చెప్పడం ఇప్పుడు ప్రపంచవ్యాప్తంగా సంచలనం సృష్టిస్తోంది. ఇంతకీ ఆ మహిళ ఎవరు? ఆమె నేపథ్యం ఏంటి? అనే వివరాలు ఇప్పుడు బయటకు వస్తున్నాయి.
వివరాల్లోకి వెళ్తే.. సంవత్సరాంతపు విలేకరుల సమావేశంలో పాల్గొన్న పుతిన్‌ను యాంకర్ రెజినా ఒర్కోవా ఆయన ప్రేమ వ్యవహారం గురించి ప్రశ్నించారు. దానికి పుతిన్ ఏమాత్రం తడుముకోకుండా “అవును” అని ఒకే మాటలో సమాధానమిచ్చారు. సాధారణంగా తన వ్యక్తిగత విషయాలను బహిరంగంగా పంచుకోని పుతిన్, ఇలా ఓపెన్ అవ్వడం అందరినీ ఆశ్చర్యపరిచింది. అయితే తన ప్రేమికురాలు ఎవరు అనే విషయాన్ని మాత్రం ఆయన వెల్లడించలేదు.
ఎవరామె? పుతిన్ తన భార్య ల్యూడ్మిలాకు 2014లో విడాకులు ఇచ్చారు. అప్పటి నుండి ఆయన ఒక మహిళతో రహస్యంగా ప్రేమలో ఉన్నారని ఊహాగానాలు వస్తున్నాయి. ప్రస్తుతం పుతిన్ ప్రియురాలిగా ప్రచారంలో ఉన్న మహిళ పేరు అలీనా కబేవా (వయస్సు 42).
అలీనా కబేవా నేపథ్యం:
- అలీనా రష్యాకు చెందిన ప్రసిద్ధ జిమ్నాస్టిక్స్ క్రీడాకారిణి.
- ఆమె 2004 ఒలింపిక్స్‌లో బంగారు పతకాన్ని గెలుచుకుంది. తన కెరీర్‌లో ప్రపంచ ఛాంపియన్‌షిప్‌లో 9 స్వర్ణ పతకాలను సాధించింది.
- క్రీడల నుండి విరమణ పొందాక, ఆమె పుతిన్ యొక్క ‘యునైటెడ్ రష్యా’ పార్టీ తరపున 2007 నుండి 2014 వరకు ఎంపీగా పనిచేశారు.
- రష్యాలోని ఒక ప్రముఖ మీడియా గ్రూప్‌కు ఆమె చైర్మన్‌గా కూడా వ్యవహరిస్తున్నారు.
- పుతిన్ మరియు అలీనాకు ఇప్పటికే ఇద్దరు పిల్లలు ఉన్నట్లు అంతర్జాతీయ మీడియాలో అనేక వార్తలు వచ్చాయి.
పుతిన్ తన భార్యకు విడాకులు ఇవ్వడానికి కూడా అలీనాతో ఉన్న సంబంధమే కారణమని అప్పట్లో ప్రచారం జరిగింది. ఏదేమైనా, పుతిన్ స్వయంగా తాను ప్రేమలో ఉన్నానని అంగీకరించడంతో, ఆమె అలీనా కబేవానే అని రష్యా మీడియా దాదాపు ఖరారు చేస్తోంది.