ఆంధ్రప్రదేశ్‌లో 37 ఏళ్ల మహిళకు, 17 ఏళ్ల మైనర్ బాలుడితో వివాహేతర సంబంధం ఏర్పడింది. వీరి వ్యవహారానికి అడ్డుగా ఉన్నారని అత్తను, భర్తను హతమార్చేందుకు ఆ మహిళ ప్రయత్నించిన ఘటన స్థానికులను భయాందోళనకు గురిచేసింది.
అసలేం జరిగింది? చిత్తూరు నగరంలోని చామంతిపురం ప్రాంతానికి చెందిన కవితకు 17 ఏళ్ల క్రితం విజయ్ అనే వ్యక్తితో వివాహమైంది. వీరికి 15 ఏళ్ల వయసున్న ఇద్దరు పిల్లలు ఉన్నారు. అయితే, కవితకు అదే ప్రాంతానికి చెందిన 17 ఏళ్ల బాలుడితో పరిచయం ఏర్పడి అది వివాహేతర సంబంధానికి దారితీసింది. అతను చిన్న పిల్లాడు కావడంతో ఎవరికీ అనుమానం రాలేదు. వీరిద్దరూ తరచూ ఏకాంతంగా గడిపేవారు. ఒక దశలో తన భార్యకు, కొడుకు వయసున్న బాలుడితో సంబంధం ఉందని తెలిసిన భర్త విజయ్ ఆమెను తీవ్రంగా మందలించాడు.
హత్యకు కుట్ర: మారాల్సింది పోయి కవిత తన ప్రియుడితో కలిసి భర్తను, అత్త నిర్మలను అడ్డుతొలగించుకోవాలని పథకం వేసింది. ప్లాన్ ప్రకారం, భర్త మరియు పిల్లలు ఇంట్లో లేని సమయం చూసి బాలుడిని పిలిపించింది. చేతిలో కత్తి, కారంపొడితో వచ్చిన ఆ బాలుడు కవిత అత్త నిర్మల కళ్లలో కారం చల్లి, కత్తితో ఆమె గొంతు కోయడానికి ప్రయత్నించాడు. అయితే నిర్మల గట్టిగా కేకలు వేస్తూ ప్రతిఘటించడంతో చుట్టుపక్కల వారు అక్కడికి చేరుకున్నారు. దీంతో పట్టుబడతామనే భయంతో ఆ బాలుడు అక్కడి నుండి పరారయ్యాడు.
పోలీసుల చర్య: నిర్మలను చిత్తూరు ప్రభుత్వ ఆసుపత్రికి తరలించిన పోలీసులు కేసు నమోదు చేసి విచారణ చేపట్టారు. ఈలోపే కవిత పరారీ కాగా, ఆ 17 ఏళ్ల బాలుడు పోలీసులకు చిక్కాడు. హత్యాయత్నం కింద కేసు నమోదు చేసిన పోలీసులు బాలుడిని జువైనల్ హోమ్‌కు తరలించారు. పరారీలో ఉన్న కవిత కోసం గాలిస్తున్నారు.