ఆదిత్య ధర్ దర్శకత్వంలో రణవీర్ సింగ్ నటించిన ‘ధురంధర్ 2’ బాక్సాఫీస్ వద్ద రికార్డులు సృష్టిస్తోంది. విడుదలైన కేవలం 13 రోజుల్లోనే ప్రపంచవ్యాప్తంగా రూ. 1400 కోట్లకు పైగా వసూళ్లు సాధించి చరిత్ర సృష్టించింది. అయితే, ఈ బ్లాక్ బస్టర్ విజయం మధ్యలో సినిమా వివాదాల్లో చిక్కుకుంది. ఒక ఫిల్మ్ మేకర్ ఈ సినిమా తన 2023 నాటి స్క్రిప్ట్‌ను కాపీ చేసిందని ఆరోపించారు.
స్క్రిప్ట్ కాపీ ఆరోపణలు: ఈ టైమ్స్ నివేదిక ప్రకారం, ఫిల్మ్ మేకర్ సంతోష్ కుమార్ ఆర్ఎస్ ఈ ఆరోపణలు చేశారు. రణవీర్ సింగ్ నటించిన ‘ధురంధర్ 2’ తను 2023లో రాసుకున్న కథ ఆధారంగా రూపొందిందని ఆయన వాదిస్తున్నారు. దీనికి సంబంధించి రిజిస్ట్రేషన్ పత్రాలను, ఆధారాలను చూపుతూ చట్టపరమైన చర్యలు తీసుకుంటానని ఆయన ప్రకటించారు.
సంతోష్ కుమార్ వాదన: “మీరందరూ ‘ధురంధర్ 2’ చూసే ఉంటారు. అది అద్భుతంగా ఆడుతోంది. కానీ సినిమా చూశాక అది నా కథే అని నాకు అర్థమైంది. 2023లో ఎంతో కష్టపడి ఈ స్క్రిప్ట్ రాశాను. పెద్ద నటులు కావాలంటే కార్పొరేట్ సంస్థల మద్దతు ఉండాలని చెప్పడంతో సోనీ పిక్చర్స్, జీ స్టూడియోస్, టీ-సిరీస్ మరియు ధర్మా ప్రొడక్షన్స్ వంటి పెద్ద నిర్మాణ సంస్థలకు ఈ కథను వివరించాను” అని సంతోష్ తెలిపారు. తొలుత ఆయన ఈ కథలో హీరోగా ఆదిత్య రాయ్ కపూర్‌ను అనుకున్నారట.
కేసు వేయనున్న సంతోష్: “నేను స్క్రీన్ రైటర్స్ అసోసియేషన్‌లో నవంబర్ 2023లో నా కథను రిజిస్టర్ చేయించాను. నా దగ్గర అన్ని ఆధారాలు ఉన్నాయి. వారు మంచి సినిమా తీసినా, నా కథను తప్పుగా వాడుకున్నారు. నేను వినోదం కోసం రాసిన కథను వారు రాజకీయ ప్రోపగండా (Political Propaganda) గా మార్చేశారు. ఇది నన్ను బాధపెడుతోంది. నాపై జరిగిన అన్యాయం ఇంకెవరికీ జరగకూడదని ఈ విషయాన్ని అందరికీ చెబుతున్నాను” అని ఆయన పేర్కొన్నారు.
ఎవరీ సంతోష్ కుమార్? ఐఎండీబీ (IMDb) ప్రొఫైల్ ప్రకారం, సంతోష్ కుమార్ ఆర్ఎస్ కర్ణాటకలోని శివమొగ్గ జిల్లా తీర్థహళ్లికి చెందినవారు. ఆయన కన్నడ చిత్రం ‘క్యాంపస్ క్రాంతి’ (2023)తో దర్శకుడిగా పరిచయమయ్యారు. ప్రస్తుతం ఆయన 2026లో విడుదల కానున్న పాన్-ఇండియా యాక్షన్ థ్రిల్లర్ ‘యువాన్ రాబిన్‌హుడ్’ పనుల్లో ఉన్నారు.
సోషల్ మీడియాలో చర్చ: ఈ ఆరోపణల తర్వాత సోషల్ మీడియాలో నెటిజన్లు రెండు వర్గాలుగా విడిపోయారు. కొందరు సంతోష్‌కు మద్దతు తెలుపుతుండగా, మరికొందరు ఇది కేవలం ‘పబ్లిసిటీ స్టంట్’ అని కొట్టిపారేస్తున్నారు. “సినిమా హిట్ అయ్యాక పబ్లిసిటీ కోసం వచ్చారు” అని ఒకరు కామెంట్ చేయగా, “పార్ట్ 2 రిలీజ్ అయ్యాక నిద్రలేచారా? పార్ట్ 3 వరకు వెయిట్ చేయనందుకు సంతోషం” అని మరొకరు ఎద్దేవా చేశారు.