బెంగళూరులోని విద్యారణ్యపుర ప్రాంతానికి చెందిన కాలేజీ విద్యార్థినులు తనిష్క, తేజస్విని గత జనవరి 31న కళాశాలకు వెళ్తున్నామని చెప్పి ఇంటి నుంచి బయలుదేరారు.
వారిద్దరూ తమ వెంట మొబైల్ ఫోన్లు గానీ, ఏటీఎం కార్డులు గానీ ఏవీ తీసుకెళ్లకుండా కేవలం ఆధార్ కార్డును మాత్రమే వెంట తీసుకెళ్లడంతో వారి ఆచూకీ కనిపెట్టడం పోలీసులకు తీవ్ర సవాలుగా మారింది. స్థానిక పోలీసులు ముమ్మరంగా గాలించినప్పటికీ ఎలాంటి ఫలితం దక్కకపోవడంతో, తనిష్క కుటుంబ సభ్యులు కర్ణాటక హైకోర్టును ఆశ్రయించారు. అనంతరం ఈ కేసు దర్యాప్తును నేర పరిశోధన విభాగం (సీఐడీ)కి అప్పగించారు.
దర్యాప్తులో.. మలే మహదేశ్వర కొండ ప్రాంతంలో వీరిద్దరూ కనకపురకు చెందిన ఓ యువకుడిని కలిసినట్లు వెల్లడైంది. కుటుంబ నేపథ్యంపై అబద్ధాలు చెప్పి ఆ యువకుడి నమ్మకాన్ని చూరగొన్న తనిష్క, అతడిని వివాహం కూడా చేసుకున్నట్లు తెలిసింది. తేజస్విని కూడా వారితో పాటే ఉంటోంది. కొన్ని నెలల పాటు పోలీసులకు ఎలాంటి ఆధారాలు లభించకపోవడంతో, సీఐడీ అధికారులు ఆ విద్యార్థినుల ఆధార్ వివరాలను నిరంతర నిఘాలో ఉంచారు.
సుమారు ఎనిమిది నెలల తర్వాత, తనిష్క కొత్త సిమ్ కార్డు తీసుకునేందుకు తన ఆధార్ కార్డును ఉపయోగించింది. ఆ గుర్తింపు పత్రాన్ని ఉపయోగించిన మరుక్షణమే టెలికాం సంస్థ ద్వారా సీఐడీ అధికారులకు అలర్ట్ చేరింది. ఆ సమాచారం ఆధారంగా చేపట్టిన సాంకేతిక దర్యాప్తుతో విద్యార్థినులు ఉన్న స్థావరాన్ని అధికారులు విజయవంతంగా గుర్తించి, ఈ సుదీర్ఘ గాలింపు చర్యలకు ముగింపు పలికారు.