మన ఎదుగుదలను చూసి ఓర్వలేని బంధువులు బయట ఎంతమంది ఉంటారో, ఆఫీసుల్లో కూడా మన పనితీరును చూసి అసూయపడే సహోద్యోగులు (Colleagues) అంతే సంఖ్యలో ఉంటారు. అందుకే పని చేసే చోట ఎంత జాగ్రత్తగా ఉన్నా తక్కువే. ముఖ్యంగా మాట్లాడేటప్పుడు ‘మైయంతా కళ్లు’ అన్నట్టుగా వ్యవహరించాలి.
మనం మాట్లాడే ఒక్క తప్పుడు మాట మన ఉద్యోగానికి, పేరుకు, అంతిమంగా మన భవిష్యత్తుకే ముప్పు తెచ్చే అవకాశం ఉంది. అందుకే ఆఫీసులో కబుర్లు చెప్పేటప్పుడు కాస్త నిగ్రహం పాటించాలి. ముఖ్యంగా ఈ క్రింది విషయాలను అస్సలు షేర్ చేసుకోకూడదు. ఆ వివరాలేంటో చూద్దాం రండి..
సహోద్యోగులతో పొరపాటున కూడా చర్చించకూడని విషయాలు:
- జీతం గురించి గోప్యత పాటించండి: మీ జీతం ఎంత? మీకు ఇతర ఆదాయ వనరులు ఏమున్నాయి? వంటి విషయాలు సహోద్యోగులతో చెప్పకండి. మీ జీతం వారి కంటే ఎక్కువగా ఉంటే అది అసూయకు దారితీస్తుంది, తక్కువగా ఉంటే చులకన భావం ఏర్పడుతుంది. ఇది అనవసర సమస్యలకు మూలం.
- వ్యక్తిగత సమస్యలు వద్దు: ఆఫీసులో మీ వ్యక్తిగత బాధలను ఏకరువు పెట్టకండి. భవిష్యత్తులో మీ బలహీనతలను కొందరు తమ స్వార్థం కోసం వాడుకునే ప్రమాదం ఉంది.
- గాసిప్స్‌కు దూరంగా ఉండండి: ఆఫీసు రాజకీయాలు లేదా ఇతర వ్యక్తుల గురించి పుకార్లు (Gossip) మాట్లాడటం ఏమాత్రం మంచిది కాదు. ఆ మాటలు మూడో వ్యక్తికి చేరితే మీ ఉద్యోగానికే ఎసరు రావచ్చు.
- రాజకీయ చర్చలు వద్దు: మీకు నచ్చిన రాజకీయ నాయకుడు లేదా పార్టీ గురించి ఆఫీసులో వాదించకండి. భిన్న అభిప్రాయాల వల్ల సహోద్యోగుల మధ్య విభేదాలు తలెత్తి ఆఫీసు వాతావరణం పాడవుతుంది.
- కుటుంబ విషయాలు బయట పెట్టకండి: ఇంట్లో గొడవలు లేదా కుటుంబ సమస్యల గురించి ఆఫీసులో చర్చించకండి. ఇది మీ వృత్తిపరమైన ఇమేజ్‌ను దెబ్బతీస్తుంది.
- బాస్ గురించి నెగెటివ్ మాటలు వద్దు: మీ పై అధికారి (Boss) గురించి సహోద్యోగుల వద్ద ప్రతికూలంగా మాట్లాడటం పెద్ద తప్పు. ఆ మాటలు తిరిగి బాస్ దగ్గరికి చేరితే మీ కెరీర్ చిక్కుల్లో పడటం ఖాయం.
- ఆర్థిక ఇబ్బందులు చెప్పకండి: మీకు అప్పులు ఉన్నా లేదా ఇతర ఆర్థిక ఇబ్బందులు ఉన్నా ఇతరులకు చెప్పకండి. అది మీపై ఉన్న గౌరవాన్ని తగ్గిస్తుంది.
- ప్రేమ, వ్యక్తిగత సంబంధాలు: మీ ప్రేమ వ్యవహారాలు లేదా వ్యక్తిగత బంధాలను ఎంత రహస్యంగా ఉంచితే అంత మంచిది. ఆఫీసు ఇలాంటివి పంచుకోవడానికి సరైన వేదిక కాదు.
- కెరీర్ ప్లాన్స్ వెల్లడించకండి: మీరు వేరే కంపెనీలో ఇంటర్వ్యూలు ఇస్తున్నా లేదా ఉద్యోగం మారాలని ప్లాన్ చేస్తున్నా ఆ విషయాన్ని ఆఫీసులో ఎవరికీ చెప్పకండి. అది మీ ప్రస్తుత బాధ్యతలపై ప్రభావం చూపే అవకాశం ఉంది.