ఢిల్లీ: ఢిల్లీలోని బీజేపీ ప్రధాన కార్యాలయంలో ఈరోజు జరిగిన ఒక కార్యక్రమంలో రాఘవ్ చద్దా, సందీప్ పాఠక్ మరియు అశోక్ మిట్టల్లతో కలిసి హర్భజన్ సింగ్ కూడా బీజేపీలో చేరారు.
అంతకుముందు హర్భజన్ సింగ్ను బుజ్జగించేందుకు పంజాబ్ ముఖ్యమంత్రి భగవంత్ మాన్ నిరంతరం ఫోన్ చేసినట్లు తెలుస్తోంది. అయితే, హర్భజన్ కావాలనే ఆ ఫోన్ కాల్స్ను విస్మరించినట్లు సమాచారం. హర్భజన్ పార్టీని వీడతారనే సమాచారం అందగానే, ఆయనను శాంతింపజేయడానికి సీఎం ప్రయత్నించినట్లు తెలుస్తోంది. ప్రస్తుతం హర్భజన్ ముంబైలో ఐపీఎల్ కామెంటేటర్గా పనిచేస్తున్నందున ఫోన్ ఎత్తలేదని సాకులు వినిపిస్తున్నప్పటికీ, అసలు కారణం వేరే ఉందని రాజకీయ వర్గాలు అంటున్నాయి.
ముఖ్యమంత్రి వంటి సీనియర్ నాయకులు ఫోన్ చేసినప్పుడు స్పందించకపోతే, పార్టీ మారుతున్నారనే విషయం దాదాపు ఖాయమైనట్లేనని విశ్లేషకులు భావిస్తున్నారు.
నేపథ్యం: గత 2022లో క్రికెట్ నుండి రిటైర్మెంట్ ప్రకటించిన తర్వాత హర్భజన్ సింగ్ ఆమ్ ఆద్మీ పార్టీలో చేరారు. అదే ఏడాది పంజాబ్ నుండి రాజ్యసభకు ఏకగ్రీవంగా ఎన్నికయ్యారు. పార్టీలో చేరినందుకు ఆప్ ఆయనకు ఇంతటి గౌరవాన్ని ఇచ్చినప్పటికీ, హర్భజన్ పార్టీ కార్యక్రమాల్లో పెద్దగా చురుగ్గా పాల్గొనడం లేదనే విమర్శలు ఉన్నాయి.
క్రికెట్ మరియు మ్యాచ్ కామెంటరీపైనే ఎక్కువ దృష్టి సారించి, పార్టీ బాధ్యతలను పక్కన పెట్టారు. దీనివల్ల పార్టీ తీసుకునే కీలక నిర్ణయాల వెనుక ఉన్న కారణాలు ఆయనకు తెలిసేవి కావు. దీంతో ప్రతి నిర్ణయంపై ఆయన అసంతృప్తితో ఉండేవారు. ఆ కారణాల వల్లే ఆయన నేడు బీజేపీ తీర్థం పుచ్చుకున్నారు.
పంజాబ్ అసెంబ్లీ ఎన్నికల్లో భారీ విజయాన్ని సాధించిన ఆమ్ ఆద్మీ పార్టీకి, ఇప్పుడు హర్భజన్ సింగ్ వంటి స్టార్ సెలబ్రిటీ ముఖాలు దూరమవ్వడం పెద్ద ఎదురుదెబ్బగా భావిస్తున్నారు.