ఆ గంజాయి నాకూ కొంచెం ఇవ్వండి బ్రదర్..! సచిన్ – విరాట్ కోహ్లీలలో ఎవరు బెస్ట్? ఏబీ డివిలియర్స్‌ను దారుణంగా ట్రోల్ చేసిన మాజీ క్రికెటర్.. నెట్టింట రచ్చ!

క్రికెట్ దిగ్గజాలు సచిన్ టెండూల్కర్, విరాట్ కోహ్లీలలో ఎవరు అత్యుత్తమ బ్యాటర్ అనే చర్చ క్రికెట్ ప్రపంచంలో ఎప్పటికీ ముగియని ఒక హాట్ టాపిక్.

తాజాగా ఈ అంశంపై దక్షిణాఫ్రికా మాజీ స్టార్ ఆటగాడు ఏబీ డివిలియర్స్ తనదైన శైలిలో స్పందించగా.. టీమిండియా మాజీ ఫాస్ట్ బౌలర్ దొడ్డ గణేష్ అతడిని తీవ్రంగా ఎద్దేవా చేస్తూ కౌంటర్ ఇచ్చారు. ప్రస్తుతం ఈ వ్యవహారం సోషల్ మీడియాలో దావానలంలా వ్యాపిస్తోంది.

ఇటీవల ఇచ్చిన ఒక ఇంటర్వ్యూలో ఏబీ డివిలియర్స్ మాట్లాడుతూ, సచిన్ మరియు విరాట్ మధ్య పోలికలపై తన అభిప్రాయాలను పంచుకున్నారు. ఆసియా వెలుపల పేస్, బౌన్స్ ఉండే కఠినమైన పిచ్‌లపై సైతం ఉపఖండపు బ్యాటర్లు అద్భుతంగా రాణించగలరని ప్రపంచానికి తొలిసారి నిరూపించిన ఘనత సచిన్ టెండూల్కర్‌దేనని ఆయన ప్రశంసించారు.

అదే సమయంలో విరాట్ కోహ్లీ ఆ నైపుణ్యాన్ని సరికొత్త శిఖరాలకు తీసుకెళ్లాడని, విదేశీ గడ్డపై భారీగా పరుగులు సాధిస్తూ ‘స్టాండర్డ్స్‌ను మరింత పెంచాడని’ డివిలియర్స్ పేర్కొన్నారు. ఈ ఇద్దరు ఆటగాళ్ల విజయాలే తరువాతి తరం భారత బ్యాటర్లకు కొండంత స్ఫూర్తినిచ్చాయని ఆయన తెలిపారు.

అయితే డివిలియర్స్ చేసిన ఈ విశ్లేషణను భారత మాజీ పేసర్ దొడ్డ గణేష్ ఏమాత్రం జీర్ణించుకోలేకపోయారు. ‘ఎక్స్’ (ట్విట్టర్) వేదికగా డివిలియర్స్ వ్యాఖ్యలను షేర్ చేస్తూ.. “నువ్వు తాగే ఆ గంజాయి ఏదో నాక్కూడా కొంచెం ఇవ్వండి బ్రదర్ (Pass on the weed, brother)” అంటూ తీవ్ర వ్యంగ్యంగా రీట్వీట్ చేశారు.

దొడ్డ గణేష్ ఇచ్చిన ఈ సెటైరికల్ పంచ్ క్షణాల్లోనే క్రికెట్ అభిమానుల్లో వైరల్‌గా మారింది. కోహ్లీని సచిన్ కంటే ఒక మెట్టు పైన నిలబెట్టే డివిలియర్స్ అభిప్రాయాన్ని దొడ్డ గణేష్ పూర్తిగా కొట్టిపారేశారని నెటిజన్లు భావిస్తున్నారు. దీంతో ఎప్పటినుంచో సాగుతున్న సచిన్ వర్సెస్ కోహ్లీ చర్చకు ఈ వివాదం సరికొత్త మలుపునిచ్చింది.