“ఇంకెప్పుడైనా ఇలాంటి రీల్స్ చేస్తారా!”.. డ్యామ్‌లోకి దూకి హల్‌చల్ చేసిన యువకులకు పోలీసుల వినూత్న శిక్ష!!

సోషల్ మీడియాలో లైకులు, వ్యూస్ కోసం యువత ప్రాణాల మీదకు తెచ్చుకునే ప్రమాదకర విన్యాసాలు చేయడం నానాటికీ తీవ్ర ఆందోళన కలిగిస్తోంది.

ఈ క్రమంలో, ఉప్పియన్ డ్యామ్ వద్ద కొందరు యువకులు ఎటువంటి భద్రతా ఏర్పాట్లు లేకుండా అత్యంత ప్రమాదకర రీతిలో నీటిలోకి దూకుతూ రీల్స్ వీడియోలను చిత్రీకరించారు. దీనిని గమనించిన స్థానికులు వెంటనే పోలీసులకు సమాచారం అందించారు.

సమాచారం అందుకుని ఘటనా స్థలానికి చేరుకున్న పోలీసులు, ఆ యువకులను నీటిలో నుంచి సురక్షితంగా బయటకు తీసుకొచ్చారు. వారు చేసిన ప్రాణాంతకమైన పనికి వినూత్న రీతిలో బుద్ధి చెప్పేందుకు చర్యలు చేపట్టారు. కేవలం హెచ్చరికలతో వదిలిపెట్టకుండా, ప్రజల్లో భద్రతా స్పృహ కలిగించేలా వారి చేత రోడ్డుపై కప్పగంతులు వేయిస్తూ, గుంజీలు తీయిస్తూ దండాలు తీయించి వినూత్న రీతిలో శిక్ష విధించారు.

సోషల్ మీడియా క్రేజ్ కోసం నిండు ప్రాణాలను పణంగా పెడుతూ బాధ్యతారహితంగా వ్యవహరించే యువతకు ఈ ఘటన ఒక గట్టి హెచ్చరికగా నిలుస్తుందని స్థానికులు అభిప్రాయపడ్డారు. నెట్టింట వైరల్ అవుతున్న ఈ రీల్స్ వ్యవహారం, పోలీసుల వినూత్న చర్య ప్రస్తుతం నెటిజన్ల మధ్య తీవ్ర చర్చనీయాంశంగా మారింది.