సాధారణంగా పూరీలను పర్ఫెక్ట్ గుండ్రని ఆకృతిలో చేయడం వంటగదిలో ఒక కష్టమైన పనిగా భావిస్తారు. అయితే, ఒక యువకుడు తన సృజనాత్మకతతో తయారు చేసిన ఒక పరికరం ఇంటర్నెట్‌లో భారీ ఆదరణ పొందుతోంది.
మార్కెట్లో లభించే ఖరీదైన పూరీ మేకర్ మెషీన్లకు బదులుగా, అతను ఒక చెక్కముక్క మరియు దాని కింద ఒక టిఫిన్ బాక్స్‌ను అమర్చి ఈ కొత్త పరికరాన్ని తయారు చేశాడు.
వైరల్ అవుతున్న ఆ వీడియోలో, పిండి ముద్దను ఉంచి చెక్కముక్కతో గట్టిగా నొక్కగానే, కేవలం కొన్ని సెకన్లలో అది ఖచ్చితమైన గుండ్రని ఆకృతిలో పూరీగా మారడం చూసి అందరూ ఆశ్చర్యపోతున్నారు. ఇన్‌స్టాగ్రామ్‌లో షేర్ చేయబడిన ఈ వీడియో లక్షలాది వ్యూస్‌ను సొంతం చేసుకుంది. నెటిజన్లు ఆ యువకుడి సృజనాత్మకతను ప్రశంసలతో ముంచెత్తుతున్నారు.
“అమ్మ పనిని ఈ యువకుడు చాలా సులభతరం చేశాడు” అని కొందరు, “ఇలాంటి ప్రతిభను ప్రోత్సహించాలి” అని మరికొందరు నెటిజన్లు తమ అభిప్రాయాలను పంచుకుంటున్నారు.