ఇకపై పాలస్తీనా స్వతంత్ర దేశంగా మారడం అసాధ్యం! అంతర్జాతీయ నిబంధనలను ఉల్లంఘిస్తూ ఇజ్రాయెల్ సంచలన చర్య!

జెరూసలేం: వెస్ట్ బ్యాంక్ (పశ్చిమ తీరం)లోని హెబ్రాన్ నగర పరిపాలనకు సంబంధించి 1997లో కుదిరిన ‘హెబ్రాన్ ఒప్పందం’లోని కీలక భాగాలను ఇజ్రాయెల్ రద్దు చేసినట్లు ఆ దేశ ఆర్థిక మంత్రి బెజాలెల్ స్మోట్రిచ్ ప్రకటించారు.

ఇజ్రాయెల్ తీసుకున్న ఈ తీవ్ర నిర్ణయం వల్ల, ఇకపై పాలస్తీనా ఒక స్వతంత్ర దేశంగా ఏర్పడే అవకాశం ఏమాత్రం లేదని అంతర్జాతీయ రాజకీయ విశ్లేషకులు హెచ్చరిస్తున్నారు. పాలస్తీనాను ముక్కలు చేయాలనే ఇజ్రాయెల్ దీర్ఘకాలిక వ్యూహంలో భాగంగానే.. ప్రస్తుతం ఈ అత్యంత కీలకమైన చర్యను అమలు చేసినట్లు తెలుస్తోంది.

ఏమిటీ ఓస్లో మరియు హెబ్రాన్ ఒప్పందం?
ఓస్లో శాంతి ఒప్పందంలో భాగంగా, 1997లో ఇజ్రాయెల్ ప్రధాని బెంజమిన్ నెతన్యాహు మరియు పాలస్తీనా అధ్యక్షుడు యాసర్ అరాఫత్ ల మధ్య ‘హెబ్రాన్ నగర ఒప్పందం’ కుదిరింది. ఈ ఒప్పందం ప్రకారం హెబ్రాన్ నగరాన్ని రెండు విభాగాలుగా విభజించారు:

H1 ప్రాంతం: ఇది పాలస్తీనా అధికారిక ప్రభుత్వ పూర్తి నియంత్రణలోకి వచ్చింది.

H2 ప్రాంతం: ఇది యూదుల స్థావరాలు మరియు వారి పవిత్ర స్థలాలు ఉన్న ప్రాంతం. ఈ H2 ప్రాంతంలో భద్రతా బాధ్యతలను ఇజ్రాయెల్ చూసుకున్నప్పటికీ.. నగర ప్రణాళిక (అర్బన్ ప్లానింగ్), నిర్మాణాలు మరియు పౌర పరిపాలన (సివిల్ అడ్మినిస్ట్రేషన్) అధికారాలు పాలస్తీనా మున్సిపాలిటీ పరిధిలోనే ఉంచబడ్డాయి.

అయితే, ఇప్పుడు ఆ H2 ప్రాంతంలోని నగర ప్రణాళిక, నిర్మాణాలు మరియు పౌర పరిపాలన అధికారాలను కూడా పూర్తిగా తమ ఆధీనంలోకి తీసుకుంటున్నట్లు ఇజ్రాయెల్ అధికారికంగా ప్రకటించింది.

ఇజ్రాయెల్ ఆర్థిక మంత్రి వ్యాఖ్యలు
ఈ నిర్ణయంపై ఇజ్రాయెల్ ఆర్థిక మంత్రి బెజాలెల్ స్మోట్రిచ్ మాట్లాడుతూ.. “ఇన్నేళ్లుగా ఓస్లో ఒప్పందంలోని అత్యంత హాస్యాస్పదమైన నిబంధన ఒకటి అమలులో ఉండేది. యూదుల నివాస ప్రాంతాలు మరియు ఇబ్రహీమి మసీదు వంటి పవిత్ర స్థలాల పరిపాలనా అధికారాలు పాలస్తీనా మున్సిపాలిటీ చేతిలో చిక్కుకున్నాయి. నిన్నటితో మేము దానికి ముగింపు పలికాము” అని స్పష్టం చేశారు.

ఇకపై హెబ్రాన్‌లోని యూదుల స్థావరాలు, మౌలిక సదుపాయాలు మరియు చారిత్రక కట్టడాల అభివృద్ధికి సంబంధించిన పూర్తి అధికారాలు ఇజ్రాయెల్ యొక్క ‘హై-లెవల్ ప్లానింగ్ కమిటీ’కి అప్పగించబడ్డాయి.

మరోవైపు, ఇజ్రాయెల్ తీసుకున్న ఈ చర్య అంతర్జాతీయ చట్టాలకు విరుద్ధమని మరియు ఇది ప్రత్యక్ష దురాక్రమణ కిందకే వస్తుందని పాలస్తీనా ప్రభుత్వం తీవ్రంగా ఖండించింది. తమను అణచివేయాలనే లక్ష్యంతో చేసిన ఈ నిర్ణయంపై అమెరికా మరియు ప్రపంచ దేశాలు తక్షణమే జోక్యం చేసుకోవాలని పాలస్తీనా విదేశాంగ శాఖ కోరింది.

స్వతంత్ర పాలస్తీనాకు ఎందుకు ముప్పు?
హెబ్రాన్ నగరాన్ని ఇజ్రాయెల్ పూర్తిగా తన ఆధీనంలోకి తీసుకుంటే, స్వతంత్ర పాలస్తీనా దేశం ఏర్పాటు కావడం అసాధ్యమని అంతర్జాతీయ విశ్లేషకులు ఖచ్చితంగా చెబుతున్నారు. దానికి గల ప్రధాన కారణాలు ఇవే:

వెస్ట్ బ్యాంక్ (పశ్చిమ తీరం) యొక్క మొత్తం ఆర్థిక వ్యవస్థలో దాదాపు 3వ వంతు (1/3 వంతు) ఆదాయాన్ని ఒక్క హెబ్రాన్ నగరమే అందిస్తుంది. మార్బుల్స్ (పలింగు రాళ్లు), గాజు వస్తువులు, పాదరక్షలు మరియు వ్యవసాయ ఉత్పత్తులలో ఇది పాలస్తీనాకు అతిపెద్ద వాణిజ్య కేంద్రంగా (ట్రేడింగ్ హబ్) విరాజిల్లుతోంది. ఒక స్వతంత్ర దేశం ఆర్థికంగా నిలదొక్కుకోవాలంటే హెబ్రాన్ లాంటి బలమైన ఆర్థిక కేంద్రం పాలస్తీనాకు అత్యంత అవసరం. దీన్ని వ్యూహాత్మకంగా స్వాధీనం చేసుకోవడం ద్వారా, స్వతంత్ర పాలస్తీనా అనే ఆలోచననే ఇజ్రాయెల్ దెబ్బతీసిందని నిపుణులు విశ్లేషిస్తున్నారు.