బ్యూనస్ ఐరిస్: శిక్షణ విమానంలో తనతో పాటు ఉన్న విద్యార్థినిని ఒంటరిని చేసి, ఒక పైలట్ విమానం నుండి దూకి ఆత్మహత్య చేసుకున్న షాకింగ్ ఘటన అర్జెంటీనాలో చోటుచేసుకుంది.
ఘటన వివరాలు: విమానం గాలిలో ఎగురుతుండగా ఈ దారుణం జరిగింది. 42 ఏళ్ల ఫ్లైట్ ఇన్స్ట్రక్టర్, 22 ఏళ్ల విద్యార్థినితో కలిసి శిక్షణ ఇస్తుండగా, ఒక్కసారిగా తన సీట్ బెల్ట్ మరియు హెడ్ సెట్ తీసివేసి విమానం తలుపులు తెరిచి కిందికి దూకేశాడు. మధ్య అర్జెంటీనాలోని టోలెడో ప్రాంతంలో జరిగిన ఈ ఘటన అంతర్జాతీయ మీడియాను సైతం దిగ్భ్రాంతికి గురిచేసింది.
మరణించిన వ్యక్తిని అనుభవజ్ఞుడైన ఫ్లైట్ ఇన్స్ట్రక్టర్ లియాండ్రో ఆండ్రెస్ బెర్టాసో (42)గా గుర్తించారు. ‘సెస్నా 150’ అనే చిన్న విమానంలో రొసారియో అనే విద్యార్థినితో కలిసి ఆయన శిక్షణ ఇస్తున్నాడు. విమానం ప్రయాణిస్తుండగా బెర్టాసో ప్రశాంతంగా, “ఇక ఏమి చేయాలో నీకు బాగా తెలుసు, ముందుకు సాగు” అని చెప్పి, వెంటనే బలంగా విమానం తలుపు తెరిచి దూకేసినట్లు విద్యార్థిని తెలిపింది.
సంయమనం పాటించిన విద్యార్థిని: గంటకు 200 కి.మీ కంటే ఎక్కువ వేగంతో ప్రయాణిస్తున్న విమానం తలుపును, గాలి ఒత్తిడిని అధిగమించి తెరవడం చాలా కష్టమైన పని. అయినప్పటికీ, పట్టుదలతో పైలట్ ప్రాణత్యాగానికి పాల్పడ్డాడు. కళ్లముందే తన శిక్షకుడు చనిపోవడంతో తీవ్రమైన మానసిక ఆందోళనకు లోనైనప్పటికీ, 22 ఏళ్ల రొసారియో ఏమాత్రం తడబడకుండా విమానాన్ని తన నియంత్రణలోకి తీసుకుంది. ధైర్యంగా విమానాన్ని రన్వేపై సురక్షితంగా ల్యాండ్ చేసింది. విమానానికి ఎటువంటి నష్టం జరగలేదని ఫ్లైయింగ్ స్కూల్ అధికారులు ధృవీకరించారు.
అనుమానస్పదంగా పైలట్ ప్రవర్తన: బెర్టాసోకు ఎటువంటి మానసిక సమస్యలు లేవని, ఆ రోజు ఉదయం కూడా మరో విద్యార్థితో కలిసి విజయవంతంగా శిక్షణ పూర్తి చేశాడని ఫ్లైయింగ్ స్కూల్ డైరెక్టర్ ఎడ్వర్డో అల్వారెజ్ తెలిపారు. ఎప్పుడూ నవ్వుతూ ఉండే ఆయన ఇలాంటి నిర్ణయం ఎందుకు తీసుకున్నాడో అర్థం కావడం లేదని ఆయన ఆవేదన వ్యక్తం చేశారు. అర్జెంటీనా మరియు చిలీ దేశాల్లో ఏళ్ల తరబడి అనుభవం ఉన్న సీనియర్ పైలట్ బెర్టాసో. ఈ ఘటనపై అర్జెంటీనా పబ్లిక్ ప్రాసిక్యూటర్లు సమగ్ర విచారణ చేపట్టారు.