చెన్నై: ఏఐఏడీఎంకే (AIADMK) లో తిరుగుబాటు నేతల పదవులను వరుసగా పీకేస్తున్న ఎడప్పాడి పళనిస్వామి (EPS), అసమ్మతి వర్గానికి వెన్నుదన్నుగా నిలుస్తున్న లీమా రోజ్ పదవిని మాత్రం ఎందుకు లాక్కోవట్లేదు?
ప్రస్తుతం ఏఐఏడీఎంకే మహిళా విభాగానికి రాష్ట్ర డిప్యూటీ సెక్రటరీగా లీమా రోజ్ ఉన్నారు. ఆమె పార్టీ పదవిని ఎడప్పాడి పళనిస్వామి ఇంకా ఎందుకు తొలగించలేదనే ప్రశ్న ఇప్పుడు రాజకీయ వర్గాల్లో ఆసక్తికరంగా మారింది. ఎడప్పాడి పళనిస్వామిని ఉద్దేశించి లీమా రోజ్ చేసిన వ్యాఖ్యలు, ఈపీఎస్ వ్యతిరేక వర్గంలో తీవ్ర సంచలనంగా మారాయి. తమిళ వెట్రి కళగం (TVK) పార్టీ ప్రభుత్వానికి మద్దతు ఇచ్చే విషయంలో ఎడప్పాడికి, ఏఐఏడీఎంకే సీనియర్లకు మధ్య తలెత్తిన విభేదాల కారణంగా పార్టీ చీలిపోయే పరిస్థితికి వచ్చిందనేది అందరికీ తెలిసిన విషయమే.
అదే సమయంలో, తన నాయకత్వానికి, తన నిర్ణయాలకు వ్యతిరేకంగా తిరుగుబాటు బావుటా ఎగురవేస్తున్న సీనియర్లతో సహా 25 మంది ఎమ్మెల్యేలను, వారి మద్దతుదారులైన జిల్లా కార్యదర్శులను ఎడప్పాడి పళనిస్వామి పార్టీ పదవుల నుండి తొలగిస్తున్నారు. కేవలం తొలగించడమే కాకుండా, ఆ స్థానాల్లో తన అనుచరులను నియమించుకుంటున్నారు.
లాటరీ కింగ్ మార్టిన్ భార్య లీమా రోజ్ ఈ పరిస్థితుల్లో, తిరుగుబాటుదారుల కూటమిలో లాటరీ కింగ్ మార్టిన్ భార్య లీమా రోజ్ కూడా ఉన్నారు. ఎడప్పాడికి వ్యతిరేకంగా ఏకమైన నాయకులకు ఆర్థిక పరంగా లీమా రోజ్ పెద్ద అండగా నిలుస్తున్నట్లు సమాచారం. అంతేకాకుండా, భవిష్యత్తులో టీవీకే (TVK) అధికారంలోకి వస్తే మంత్రి కావాలనే ప్రణాళికతోనే ఆమె ఎస్.పి. వేలుమణి వర్గానికి ముఖ్య ఆధారం గా మారారని అంటున్నారు. ఏఐఏడీఎంకే జనరల్ కౌన్సిల్ సభ్యులను ఎడప్పాడికి వ్యతిరేకంగా తమ వైపు తిప్పుకోవడంలో లీమా ఆర్థిక వ్యూహాలు కూడా కీలక పాత్ర పోషిస్తున్నాయి.
లీమా రోజ్ పార్టీ పదవిని ఎందుకు తీసేయలేదు? ఇలాంటి తరుణంలో, వ్యతిరేకించే వారి పదవులన్నీ ఊడబీకుతున్న ఎడప్పాడి, తిరుగుబాటు దారుల ఆర్థిక మూలమైన లీమా రోజ్ పదవిని ఎందుకు తాకడం లేదు? ఏఐఏడీఎంకే మహిళా విభాగానికి రాష్ట్ర డిప్యూటీ సెక్రటరీగా ఉన్న లీమా పదవిని ఈపీఎస్ ఇంకా తొలగించలేదు.
నిన్న వేలుమణి, తంగమణి (షణ్ముగం) నేతృత్వంలోని ముఖ్య నేతలు ఒకచోట సమావేశమై తదుపరి కార్యాచరణపై చర్చించారు. ఈ సమావేశంలో లీమా రోజ్ కూడా పాల్గొన్నారు. ఆ సమయంలో, ఎడప్పాడి అందరి పదవులనూ వరుసగా పీకేస్తున్న విషయాన్ని ప్రస్తావిస్తూ.. “లీమా మాత్రమే ఈ పదవుల తొలగింపు నుండి తప్పించుకున్నారు” అని ఎస్.పి. వేలుమణి సరదాగా వ్యాఖ్యానించారు.
దానికి లీమా రోజ్ నవ్వుతూ స్పందిస్తూ.. ‘‘అన్నయ్యా.. నా పార్టీ పదవిని ఆయన (ఎడప్పాడి) హ్యాపీగా పీకేసుకోవచ్చు, నాకేం అభ్యంతరం లేదు. కానీ, నన్ను పార్టీలో చేర్చుకోవడానికి ఆయన నాతో జరిపిన బేరసారాలు, పార్టీ ఫండ్ పేరుతో నా దగ్గర నుండి వసూలు చేసిన భారీ మొత్తం, అలాగే ఈ పార్టీ పదవి ఇవ్వడానికి తీసుకున్న డబ్బుల గురించిన నిజాలను నేను ఎడప్పాడికి వ్యతిరేకంగా బహిరంగపరుస్తాను. నా దగ్గర తీసుకున్న డబ్బులు నాకు తిరిగి ఇచ్చేసి, నా పదవి మాత్రమే కాదు.. నన్ను పార్టీ నుండి కూడా తీసేయమనండి అని నేను మీడియా ముందు ప్రెస్ మీట్ పెడితే.. ఆ తర్వాత ఆయన మొహం ఎక్కడ పెట్టుకుంటారు?’’ అని వ్యంగ్యంగా వ్యాఖ్యానించినట్లు తిరుగుబాటు వర్గ నేతలు చెబుతున్నారు.