టెల్ అవీవ్/నెటివోట్:యుద్ధ మేఘాల మధ్య నలుగుతున్న ఇజ్రాయెల్లో ఇప్పుడు మరో కొత్త ఆందోళన మొదలైంది. దక్షిణ ఇజ్రాయెల్లోని నెటివోట్ నగరంలో ఆకాశం నుంచి ఊడిపడ్డాయా అన్నట్లు వేలాది తేనెటీగలు ఒక్కసారిగా దాడి చేశాయి. ఒక భారీ వాణిజ్య సముదాయాన్ని (షాపింగ్ మాల్) చుట్టుముట్టిన ఈ తేనెటీగల దండును చూసి స్థానికులు భీతిల్లిపోతున్నారు. దీనికి సంబంధించిన దృశ్యాలు ఇప్పుడు ప్రపంచవ్యాప్తంగా సామాజిక మాధ్యమాల్లో వైరల్ అవుతుండటంతో, ఇది రాబోయే విపత్తుకు సంకేతమా అన్న చర్చ మొదలైంది.
నగరంలో అఘోషిత బంద్.. గృహనిర్బంధంలో ప్రజలు!
నెటివోట్ నగరంలోని షాపింగ్ సెంటర్లు, నివాసాల బాల్కనీలు, చివరకు రోడ్డుపై నిలిపి ఉంచిన కార్లను కూడా ఈ తేనెటీగలు వదల్లేదు. లక్షలాదిగా తరలివచ్చిన ఈ కీటకాల కారణంగా పరిస్థితి విషమించడంతో స్థానిక యంత్రాంగం అత్యవసర ఆదేశాలు జారీ చేసింది. ప్రజలెవరూ ఇళ్ల నుంచి బయటకు రావద్దని, కిటికీలు, తలుపులు గట్టిగా మూసి ఉంచాలని హెచ్చరించింది. నిపుణుల బృందం రంగంలోకి దిగి ఆ తేనెటీగలను సురక్షిత ప్రాంతానికి తరలించే వరకు నగరంలో అఘోషిత బంద్ వాతావరణం నెలకొంది.
బైబిల్ భవిష్యవాణి నిజమవుతోందా?
ఈ వింత పరిణామం కేవలం ప్రకృతి ప్రక్రియేనా లేక దీని వెనుక ఏదైనా గూఢార్థం ఉందా అన్న కోణంలో నెటిజన్లు విశ్లేషణలు మొదలుపెట్టారు. బైబిల్లో పేర్కొన్న ‘కీటకాల దాడి’ మరియు వినాశన కాలానికి సంబంధించిన ప్రవచనాలతో ఈ ఘటనను పోలుస్తున్నారు. ఇప్పటికే ఇరాన్-ఇజ్రాయెల్ మధ్య ఉద్రిక్తతలు కొనసాగుతున్న తరుణంలో, ఇన్ని వేల తేనెటీగలు ప్రత్యక్షమవ్వడం ఏదో పెద్ద అనర్థానికి ముందస్తు హెచ్చరిక అని పలువురు అభిప్రాయపడుతున్నారు.
గతంలో కాకులు.. ఇప్పుడు తేనెటీగలు!
కొద్దిరోజుల క్రితమే టెల్ అవీవ్ నగర ఆకాశంలో వేలాది కాకులు ఒక్కసారిగా వలస రావడం కలకలం రేపింది. ఇప్పుడు తేనెటీగల వంతు రావడంతో ఇజ్రాయెల్ ప్రజల్లో భయం, కుతూహలం రెండూ పెరిగుతున్నాయి. మరోవైపు, ఈ తేనెటీగల దాడి వల్ల ఇజ్రాయెల్ యుద్ధ విమానాల రాకపోకలకు కూడా ఆటంకం కలిగిందని ప్రచారం జరుగుతున్నప్పటికీ, సైన్యం దీనిని అధికారికంగా ధ్రువీకరించలేదు.
శాస్త్రవేత్తలు ఏమంటున్నారు?
అయితే శాస్త్రవేత్తలు మాత్రం ఈ వాదనలను కొట్టిపారేస్తున్నారు. వాతావరణ మార్పుల కారణంగా లేదా కొత్త ఆవాసాల వేటలో భాగంగా తేనెటీగలు తమ పాత గూళ్లను వదిలి ఇలా గుంపులుగా వలస రావడం సహజమేనని చెబుతున్నారు. కానీ, యుద్ధ భయంలో ఉన్న సామాన్య ప్రజలకు మాత్రం ఇది ఏదో దైవిక సంకేతంలాగే కనిపిస్తోంది.