గ్రేటర్ నోయిడా: గ్రేటర్ నోయిడాలో ఒక వ్యక్తి తన బట్టతలను దాచడానికి విగ్ ధరించి పెళ్లి చేసుకుని, ఆపై భార్యను బ్లాక్ మెయిల్ చేసిన ఘటన వెలుగులోకి వచ్చింది. డబ్బు ఇవ్వకుంటే మొబైల్ ఫోన్‌లో ఉన్న ఆమె వ్యక్తిగత ఫోటోలను బహిరంగపరుస్తానని భర్త బెదిరించినట్లు బాధితురాలు ఆరోపించింది.
ఈ ఘటనపై పోలీసులు భర్త మరియు అతని కుటుంబ సభ్యులు నలుగురిపై వరకట్న వేధింపులు, మోసం, దాడి, బెదిరింపులు మరియు వసూళ్ల ఆరోపణల కింద కేసు నమోదు చేశారు.
అసలేం జరిగింది? న్యూఢిల్లీలోని ప్రతాప్ బాగ్‌లో నివసించే వ్యక్తితో బాధితురాలికి వివాహం నిశ్చయమైంది. పెళ్లికి ముందు తన బట్టతలను దాచుకోవడానికి అతను విగ్ ధరించాడు. తనకు కేవలం స్వల్పంగా జుట్టు రాలుతోందని ఆమెను నమ్మించాడు. పెళ్లికి ముందు తన పరిస్థితి గురించి ఆమెకు గానీ, ఆమె కుటుంబ సభ్యులకు గానీ తెలియజేయలేదు. పెళ్లయ్యాక మొదటి రాత్రి (First Night) గదిలోకి వెళ్ళినప్పుడు భర్త తన విగ్ తీయడంతో అసలు సత్యం బయటపడింది.
అది చూసి షాక్ అయిన వధువుకు ఏం చేయాలో పాలుపోలేదు. అయితే అప్పటి నుండి భర్త మరియు అత్తమామల ప్రవర్తన పూర్తిగా మారిపోయిందని ఆమె ఆరోపించింది. భర్త తన మొబైల్ ఫోన్‌లో ఆమె వ్యక్తిగత ఫోటోలు తీసి, డబ్బులు ఇవ్వకపోతే వాటిని సోషల్ మీడియాలో పెడతానని బెదిరించాడు. అంతేకాకుండా, ఆమెపై దాడి చేసి సుమారు రూ. 15 లక్షల విలువైన బంగారు ఆభరణాలను బలవంతంగా లాక్కుని, కొద్దిరోజుల తర్వాత ఆమెను ఇంటి నుండి వెళ్లగొట్టారు.
బాధితురాలి ఫిర్యాదు మేరకు బిస్రాఖ్ పోలీసులు ఎఫ్ఐఆర్ నమోదు చేశారు. ఈ ఆరోపణలపై దర్యాప్తు చేస్తున్నామని, మొబైల్ ఫోన్లు మరియు ఆర్థిక లావాదేవీలకు సంబంధించిన ఆధారాలను సేకరిస్తున్నామని ఎస్హెచ్ఓ మనోజ్ కుమార్ తెలిపారు.