చైనా: చైనాలోని యున్నాన్ ప్రావిన్స్లో తన భర్త ప్రాణాలను కాపాడాలని ఒక భార్య చేసిన ప్రయత్నం, ఆమెను కూడా మృత్యువు అంచు వరకు తీసుకెళ్లింది.
ఏం జరిగింది? ఒక రైతు తన పొలంలో పని చేస్తుండగా, అత్యంత విషపూరితమైన నాగుపాము అతని వేలిపై కాటేసింది. కొద్ది నిమిషాల్లోనే అతని వేలు వాచిపోవడం, కళ్లు తిరగడం వంటి లక్షణాలతో శరీరం బలహీనపడింది. భర్త పరిస్థితిని చూసి కంగారుపడిన భార్య, సినిమాల్లో చూసినట్లుగా.. వెంటనే అతని గాయంపై నోరు పెట్టి విషాన్ని పీల్చి బయటకు ఉమ్మేయడానికి ప్రయత్నించింది. అనంతరం భర్తను ఆసుపత్రికి తరలించారు.
మొదట్లో భార్య బాగానే ఉన్నట్లు అనిపించినా, కొన్ని గంటలకే ఆమెలో కూడా విషం ప్రభావం మొదలైంది. ఆమె నోరు, నాలుక, ముఖం మరియు చేతులు, కాళ్లు మొద్దుబారిపోయాయి. మరుసటి రోజు పరిస్థితి విషమించడంతో ఆమెను కూడా అదే ఆసుపత్రిలో ఐసీయూలో చేర్చారు. వైద్యులు ఇద్దరికీ యాంటీ-వెనం (విష విరుగుడు) మందులు అందించి చికిత్స చేయడంతో ప్రాణాపాయం తప్పింది.
వైద్యుల హెచ్చరిక: పాము కాటు వేసినప్పుడు నోటితో విషాన్ని పీల్చవచ్చనేది పూర్తిగా అపోహ అని, ఇలా చేయడం వల్ల ప్రాణాలకే ప్రమాదమని వైద్యులు హెచ్చరిస్తున్నారు.
- ఎందుకు ప్రమాదకరం?: మనిషి నోటిలో ఉండే సూక్ష్మ రక్తనాళాల ద్వారా విషం నేరుగా పీల్చేవారి రక్తంలోకి వేగంగా చేరుతుంది.
- నిజం: పాము కాటు వేసిన సెకన్ల వ్యవధిలోనే విషం చర్మం అడుగున వ్యాపిస్తుంది. కాబట్టి నోటితో పీల్చడం సాధ్యం కాని పని.
పాము కాటుకు చేయాల్సిన మరియు చేయకూడని పనులు:
- చేయకూడనివి: గాయంపై బ్లేడుతో కోయడం, రక్తాన్ని బయటకు రప్పించే ప్రయత్నం చేయడం, కాలిపోయిన నిప్పును లేదా ఐస్ ముక్కలను ఉంచడం వంటివి చేయకూడదు. దీనివల్ల రక్తస్రావం పెరగడం లేదా ఇన్ఫెక్షన్లు సోకే ప్రమాదం ఉంది.
- చేయాల్సినవి: బాధితుడిని అస్సలు కదలకుండా పడుకోబెట్టాలి. వెంటనే అత్యవసర వైద్య సహాయం కోసం పిలవాలి. సాధ్యమైతే, ఆ పాము రంగు, ఆకారాన్ని గమనించడం లేదా సురక్షిత దూరంలో ఉండి ఫోటో తీయడం వల్ల, వైద్యులు సరైన విరుగుడు మందును అందించడానికి సహాయపడుతుంది.