కూతురికి హాని తలపెడతానని బెదిరించి, ఒక పారిశుధ్య కార్మికురాలిపై ఓ వ్యక్తి నిరంతరం దారుణానికి (లైంగిక దాడికి) పాల్పడిన షాకింగ్ ఘటన మహారాష్ట్రలో వెలుగుచూసింది.
బాధితురాలు ఇచ్చిన ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు.
ఆ వ్యక్తి కోరిక తీర్చడానికి బాధితురాలు నిరాకరించినప్పుడు, ఆమె కూతురికి హాని చేస్తానని, ఆమెను కూడా వేధిస్తానని ఆ దుర్మార్గుడు బెదిరించాడు. తన కూతురి భద్రత గురించి భయపడిన ఆ మహిళను, ఆ వ్యక్తి తన గుప్పిట్లోకి తెచ్చుకుని పదేపదే దారుణానికి పాల్పడ్డాడు.
అంతేకాకుండా, ఈ విషయం గురించి బయట ఎవరికైనా చెప్పినా లేదా తనను ఎదిరించాలని చూసినా, ఆమె అశ్లీల వీడియోలను ఇన్‌స్టాగ్రామ్‌లో పెట్టి పరువు తీస్తానని బెదిరించాడు. దీంతో తీవ్ర మానసిక క్షోభకు గురైన ఆ మహిళ చివరకు పోలీస్ స్టేషన్‌ను ఆశ్రయించింది.
ఎంఐడీసీ వాలుజ్ (MIDC Waluj) పోలీస్ స్టేషన్‌లో బాధితురాలు ఇచ్చిన ఫిర్యాదు ఆధారంగా, విజయ్ భలేరావ్ అనే వ్యక్తిపై పోలీసులు కేసు నమోదు చేశారు. సదరు మహిళ ఫిర్యాదులోని ఆరోపణలపై పోలీసులు లోతైన దర్యాప్తు చేస్తున్నారు.
ఈ ఘటనకు సంబంధించిన ఆధారాలను సేకరించే పనిలో పోలీసులు నిమగ్నమయ్యారు. నిందితుడు చేసిన బెదిరింపులు, వీడియోకు సంబంధించిన ఆరోపణలపై పూర్తిస్థాయిలో విచారణ జరిపి, ఆ ఆధారాలతో తదుపరి చట్టపరమైన చర్యలు తీసుకుంటామని పోలీసులు తెలిపారు.