కేరళలోని ఓ ఆర్ట్స్ అండ్ సైన్స్ కాలేజీలో ఇన్‌స్టాగ్రామ్ పోస్ట్‌ కారణంగా సీనియర్, జూనియర్ విద్యార్థుల మధ్య తీవ్ర ఘర్షణ చోటుచేసుకుంది. ఈ ఘటన స్థానికంగా కలకలం రేపగా, విద్యార్థులు పరస్పరం దాడులు చేసుకున్న వీడియోలు వైరల్‌గా మారాయి.
ఇన్‌స్టాగ్రామ్ పోస్ట్‌తో మొదలైన గొడవ!
ఇన్‌స్టాగ్రామ్‌లో పెట్టిన ఓ పోస్ట్‌ చుట్టూ మొదలైన వివాదం క్రమంగా తీవ్రరూపం దాల్చింది. ఈ క్రమంలో ఓ వర్గానికి చెందిన విద్యార్థులు ఇద్దరు జూనియర్ విద్యార్థులను ద్విచక్ర వాహనంపై వెంబడించి, నడిరోడ్డుపై దాడి చేసినట్లు సమాచారం.
కాలేజీ ప్రాంగణంలో మొదలైన ఈ ఘర్షణ క్రమంగా విస్తరించింది. తూనేరి పెట్రోల్ బంక్ ప్రాంతంతో పాటు నాదాపురం ప్రభుత్వ ఆసుపత్రి ప్రాంగణం వరకు ఉద్రిక్తతలు వ్యాపించాయి. ఇరు వర్గాల విద్యార్థులు ఒకరిపై మరొకరు దాడులకు దిగడంతో పరిస్థితి అదుపు తప్పింది.
విద్యార్థులపై పోలీసుల లాఠీచార్జ్‌!
ఘర్షణ గురించి సమాచారం అందుకున్న నాదాపురం పోలీసులు వెంటనే సంఘటనా స్థలానికి చేరుకున్నారు. పరిస్థితిని అదుపులోకి తీసుకురావడానికి విద్యార్థులపై లాఠీచార్జ్‌ చేశారు. దీంతో అక్కడి నుంచి విద్యార్థులు చెల్లాచెదురుగా పరుగులు తీశారు.
23 మంది విద్యార్థులపై కాలేజీ యాజమాన్యం చర్యలు!
ఈ ఘటనపై పోలీసులు కేసు నమోదు చేసి, నలుగురు విద్యార్థులను అరెస్టు చేసినట్లు సమాచారం. మరోవైపు, ఘర్షణలో పాల్గొన్న 23 మంది విద్యార్థులను కాలేజీ యాజమాన్యం సస్పెండ్ చేసింది.
ఒక ఇన్‌స్టాగ్రామ్ పోస్ట్‌తో మొదలైన వివాదం చివరకు బహిరంగ ఘర్షణకు దారితీయడం, పోలీసుల లాఠీచార్జ్‌ వరకు వెళ్లడం చర్చనీయాంశంగా మారింది.
Leave a Reply