హిమాచల్ ప్రదేశ్లోని చంబా జిల్లా భర్మౌర్ ప్రాంతంలో సంభవించిన ఆకస్మిక కుండపోత వర్షం (క్లౌడ్బర్స్ట్) కారణంగా పలానీ వాగు ఉగ్రరూపం దాల్చింది. ఆ సమయంలో అటుగా వెళ్తున్న పెళ్లి బృందం వరదలో చిక్కుకుపోగా, ఒక గ్రామస్తుడు తన ప్రాణాలను సైతం లెక్కచేయకుండా పెళ్లికొడుకును వీపుపై మోసుకుంటూ సురక్షితంగా ఒడ్డుకు చేర్చిన హృద్యమైన సంఘటన వెలుగులోకి వచ్చింది.
చంబా జిల్లా భర్మౌర్ పరిధిలోని పద్మా గ్రామ పంచాయతీలో అర్ధరాత్రి వేళ ఒక్కసారిగా మేఘ విస్ఫోటనం సంభవించింది. దీంతో పలానీ వాగులో క్షణాల వ్యవధిలో భారీ వరద పోటెత్తింది. అప్పటికే పెళ్లి ముగించుకుని వస్తున్న బృందంతో పాటు స్థానికులు వాగుకు ఇరువైపులా చిక్కుకుపోయారు.
ఉధృతంగా ప్రవహిస్తున్న వరదను దాటేందుకు ఎవరూ సాహసించని సమయంలో.. సురేష్ కుమార్ అనే స్థానిక వ్యక్తి అద్భుతమైన మానవత్వాన్ని, ధైర్యాన్ని ప్రదర్శించాడు. పెళ్లి బట్టల్లో ఉన్న నవవరుడిని తన వీపుపై ఎక్కించుకుని, భీకరంగా ప్రవహిస్తున్న వరద నీటిని దాటి అవతలి ఒడ్డుకు సురక్షితంగా చేర్చాడు.
ఈ సాహసానికి సంబంధించిన వీడియో సోషల్ మీడియాలో వైరల్ అవుతూ నెటిజన్ల ప్రశంసలు అందుకుంటోంది. అయితే పలానీ వాగుపై శాశ్వత వంతెన లేకపోవడం వల్లే వర్షాకాలంలో ఇలా ప్రాణాలు అరచేతిలో పెట్టుకుని ప్రయాణించాల్సి వస్తోందని, ప్రభుత్వం వెంటనే బ్రిడ్జి నిర్మించాలని గ్రామస్తులు డిమాండ్ చేస్తున్నారు.