ఇరాక్‌లో కూలి పేలిన అమెరికా విమానం.. ఇరాన్ పనేనా? అసలేం జరుగుతోంది?

టెహ్రాన్: ఇరాన్ యుద్ధంలో పాల్గొంటున్న అమెరికా యుద్ధ విమానాలకు గాలిలోనే ఇంధనాన్ని నింపే (Refueling) పనుల్లో నిమగ్నమైన KC-135 రకానికి చెందిన ఒక విమానం ఇరాక్‌లో కూలిపోయి పేలిపోయింది.

మరో విమానం తోక భాగం విరిగిపోయిన స్థితిలో అత్యవసరంగా ల్యాండ్ అయ్యింది. ఈ ప్రమాదంలో నలుగురు సైనికులు మరణించారని, మరో ఇద్దరు తీవ్ర గాయాలతో బయటపడ్డారని అమెరికా తెలిపింది. అమెరికా దీనిని ఒక ప్రమాదంగా పేర్కొంటున్నప్పటికీ, ఇరాన్ జరిపిన దాడి వల్లనే ఇది జరిగి ఉండవచ్చని సమాచారం వెలువడుతోంది.

ప్రమాదానికి గురైన విమానం
ఇరాన్ విషయంలో అమెరికా మొండిగా వ్యవహరిస్తోంది. యుద్ధాన్ని కొనసాగించి, ఇరాన్‌లోని ప్రస్తుత ప్రభుత్వాన్ని పడగొట్టి, తనకు అనుకూలమైన ప్రభుత్వాన్ని ఏర్పాటు చేయాలని డోనాల్డ్ ట్రంప్ కృతనిశ్చయంతో ఉన్నారు. అందుకే అమెరికా నిరంతరం దాడులు చేస్తోంది, ఇరాన్ కూడా దీటుగా బదులిస్తోంది. ఈ ఘర్షణ మొత్తం గల్ఫ్ ప్రాంతంలో ఉద్రిక్తతలను పెంచింది. ఇటువంటి పరిస్థితుల్లో అమెరికా విమానం కూలిపోవడం చర్చనీయాంశమైంది.

ఇంధనం నింపే విమానం ప్రాముఖ్యత
అమెరికాకు చెందిన USS గెరాల్డ్ ఫోర్డ్ మరియు USS అబ్రహం లింకన్ యుద్ధనౌకలు ఇరాన్ సముద్ర తీరంలో ఉన్నాయి. ఇవి విమానవాహక నౌకలు. వీటిలో F-15, F-16 మరియు F-35 రకానికి చెందిన యుద్ధ విమానాలు ఉంటాయి. ఇరాన్‌పై దాడులకు వీటినే ఉపయోగిస్తున్నారు. ఈ విమానాలు వేల కిలోమీటర్లు ప్రయాణించగలవు, కానీ వాటికి మధ్యలో ఇంధనం అవసరమవుతుంది. ఇందుకోసం KC-135 విమానాలను ఉపయోగిస్తారు. ఇవి వేల లీటర్ల ఇంధనాన్ని మోసుకెళ్లి, గాలిలోనే ఇతర యుద్ధ విమానాలకు ఇంధనాన్ని నింపుతాయి.

ప్రమాదం ఎలా జరిగింది?
నిన్న ఇతర విమానాలకు ఇంధనం నింపుతున్న సమయంలోనే ఒక KC-135 విమానం ఇరాక్‌లో కూలిపోయింది. ఇందులో మొత్తం ఆరుగురు సిబ్బంది ఉండగా, నలుగురు మరణించినట్లు అమెరికా అధికారికంగా ప్రకటించింది. మిగిలిన ఇద్దరికీ తీవ్ర చికిత్స అందుతోంది.

అమెరికా వివరణ
ఈ ఘటనపై అమెరికా విడుదల చేసిన ప్రకటనలో.. ఇది శత్రువుల దాడి వల్ల గానీ, లేదా పొరపాటున జరిగిన కాల్పుల వల్ల గానీ జరగలేదని, కేవలం ప్రమాదవశాత్తూ జరిగిందని తెలిపింది. దీనిపై విచారణ జరుగుతోందని, అది పూర్తయిన తర్వాతే మృతుల వివరాలను వెల్లడిస్తామని పేర్కొంది.

ఇరాన్‌పై అనుమానాలు
అమెరికా దీనిని ప్రమాదమని చెబుతున్నా, ఇరాన్ దాడులే దీనికి కారణమై ఉండవచ్చని పలువురు భావిస్తున్నారు. ఎందుకంటే ఇరాన్ వద్ద అత్యాధునిక క్షిపణులు ఉన్నాయి. వాటిలో ఏదైనా ఒకటి ఈ విమానాన్ని తాకి ఉండవచ్చు. “సాధారణంగా ఒక KC-135 విమానం ఒక చిన్న యుద్ధ విమానానికి ఇంధనం నింపుతుంది, అలాంటప్పుడు రెండు పెద్ద KC-135 విమానాలు ఒకదానికొకటి ఎలా ఢీకొంటాయి?” అనే ప్రశ్నలు తలెత్తుతున్నాయి. ఇరాన్ దాడిని దాచడానికే అమెరికా ఇలాంటి వివరణ ఇస్తోందా అని విశ్లేషకులు అనుమానం వ్యక్తం చేస్తున్నారు.