వాషింగ్టన్/ఇస్లామాబాద్: అగ్రరాజ్యం అమెరికా మరియు ఇరాన్ మధ్య నెలకొన్న ఉద్రిక్తతలకు పరిష్కారం కనుగొనేందుకు పాకిస్థాన్ వేదికగా మరికొన్ని గంటల్లో కీలక చర్చలు జరగనున్నాయి. అయితే, ఈ చర్చల ఫలితంపై ప్రపంచం ఆసక్తిగా ఎదురుచూస్తుండగానే, అమెరికా అధ్యక్షుడు డొనాల్డ్ ట్రంప్ తనదైన శైలిలో ఇరాన్‌కు భీకర హెచ్చరికలు జారీ చేశారు. ఒకవేళ ఇస్లామాబాద్ చర్చలు విఫలమైతే, ఇరాన్‌పై విరుచుకుపడేందుకు తమ యుద్ధనౌకలు అత్యంత అధునాతన ఆయుధాలతో సిద్ధంగా ఉన్నాయని స్పష్టం చేశారు.
చర్చలు విఫలమైతే ‘కంప్లీట్ డెసిమేషన్’!
న్యూయార్క్ పోస్ట్‌కు ఇచ్చిన టెలిఫోనిక్ ఇంటర్వ్యూలో ట్రంప్ సంచలన వ్యాఖ్యలు చేశారు. “మేము మా యుద్ధనౌకలను ప్రపంచంలోనే అత్యుత్తమమైన, అత్యంత శక్తివంతమైన ఆయుధాలతో నింపుతున్నాం. గతంలో మేము వాడిన వాటికంటే ఇవి ఎంతో మెరుగైనవి. ఒకవేళ చర్చలు సఫలం కాకపోతే, ఆ ఆయుధాలను అత్యంత ప్రభావవంతంగా ఉపయోగిస్తాం. ఇరాన్‌ను పూర్తిగా తుడిచిపెట్టేందుకు (Decimation) మేము వెనకాడం” అని ట్రంప్ ఉద్ఘాటించారు.
ఇస్లామాబాద్‌కు జేడీ వెన్స్.. ఉత్కంఠలో ప్రపంచం!
అమెరికా ఉపాధ్యక్షుడు జేడీ వెన్స్ ఇప్పటికే ఎయిర్ ఫోర్స్ టూ విమానంలో ఇస్లామాబాద్‌కు బయలుదేరారు. శనివారం ఇరాన్ ప్రతినిధులతో చర్చలు ప్రారంభం కానున్నాయి. ఈ చర్చలు సఫలమవుతాయా? అన్న ప్రశ్నకు సమాధానమిస్తూ.. “మరో 24 గంటల్లో అసలు విషయం తేలిపోతుంది. ఏం జరుగుతుందో త్వరలోనే తెలుస్తుంది” అని ట్రంప్ పేర్కొన్నారు.
ఇరాన్ ద్వంద్వ వైఖరిపై ఆగ్రహం!
ఇరాన్ తన అణ్వాయుధాలను వదిలేస్తున్నామని మా ముఖం మీద చెబుతూ, బయట ప్రెస్‌తో మాత్రం ‘యురేనియం శుద్ధి చేస్తాం’ అని చెబుతోందని ట్రంప్ విమర్శించారు. “వరల్డ్స్ మోస్ట్ పవర్ ఫుల్ రీసెట్” అంటూ తన సోషల్ మీడియా ప్లాట్‌ఫారమ్ ‘ట్రూత్ సోషల్’లో ఒక రహస్యమైన పోస్ట్ కూడా పెట్టారు.
హార్ముజ్ జలసంధిపై వార్నింగ్!
హార్ముజ్ జలసంధిని అడ్డం పెట్టుకుని ప్రపంచ దేశాలను బ్లాక్ మెయిల్ చేయాలని చూడొద్దని ఇరాన్‌ను ట్రంప్ హెచ్చరించారు. “అంతర్జాతీయ జలమార్గాలను అడ్డుకుని ప్రపంచాన్ని వేధించడం తప్ప ఇరాన్ దగ్గర మరో ఆప్షన్ లేదు. వారు ప్రస్తుతం బతికి ఉన్నారంటే దానికి కారణం చర్చలకు రావడమే!” అని ట్రంప్ అత్యంత కటువైన పదజాలంతో విరుచుకుపడ్డారు.
నేపథ్యం: పాకిస్థాన్ ప్రధాని షెహబాజ్ షరీఫ్ చొరవతో బుధవారం రెండు వారాల యుద్ధ విరమణ ప్రకటించారు. ఏప్రిల్ 11న (శనివారం) ఇస్లామాబాద్‌లో అమెరికా-ఇరాన్ చర్చలు జరుగుతాయని ఆయన ప్రకటించిన నేపథ్యంలో ట్రంప్ చేసిన ఈ వ్యాఖ్యలు యుద్ధ మేఘాలను మళ్ళీ కమ్ముకునేలా చేశాయి.