సౌదీ అరేబియాపై ఇరాన్ దాడులు చేస్తోంది. ఈ నేపథ్యంలో, సౌదీతో ఉన్న పరస్పర రక్షణ ఒప్పందం (Mutual Defence Agreement) ప్రకారం తాము ఇరాన్‌పై దాడి చేయాలా? అని పాకిస్తాన్ అడిగింది. దీనికి సౌదీ అరేబియా తీవ్రంగా స్పందిస్తూ, పాక్ సైన్యాధిపతి అసీమ్ మునీర్ ప్రతిపాదనను తోసిపుచ్చింది.
ప్రస్తుతం ఇరాన్‌పై అమెరికా, ఇజ్రాయెల్ యుద్ధం ప్రకటించి దాడులు చేస్తున్నాయి. దీనికి ప్రతిచర్యగా ఇరాన్.. అమెరికా రక్షణ స్థావరాలను లక్ష్యంగా చేసుకుంటోంది. ఈ క్రమంలో సౌదీ అరేబియా సహా పలు అరబ్ దేశాలు ఇరాన్ దాడుల వల్ల ప్రభావితమయ్యాయి. యుద్ధం 8వ రోజుకు చేరుకోగా, నేడు కూడా సౌదీలోని అమెరికా వైమానిక స్థావరంపై ఇరాన్ క్షిపణి దాడి చేయగా, సౌదీ దాన్ని అడ్డుకుని ధ్వంసం చేసింది.
సహాయం కోరిన పాకిస్తాన్ – తిరస్కరించిన సౌదీ: ఈ పరిస్థితుల్లో సౌదీకి మద్దతుగా పాక్ సైన్యాధిపతి అసీమ్ మునీర్ రంగంలోకి దిగారు. సౌదీ రక్షణ శాఖ మంత్రి ఖాలిద్ సల్మాన్‌ను కలిసి, ఇరాన్‌పై దాడికి సిద్ధమని చెప్పారు. అయితే, ఈ భేటీ తర్వాత మంత్రి ఖాలిద్ సల్మాన్ తన ‘ఎక్స్’ (X) ఖాతాలో పెట్టిన పోస్ట్ పాకిస్తాన్‌కు అవమానకరంగా మారింది.
“పాక్ సైన్యాధిపతి అసీమ్ మునీర్‌తో సమావేశం జరిగింది. పరస్పర రక్షణ ఒప్పందం మేరకు సౌదీపై దాడులను అడ్డుకోవడానికి తీసుకోవాల్సిన చర్యల గురించి చర్చించాము. అయితే, ఇటువంటి ఉమ్మడి సైనిక చర్యలు ఈ ప్రాంతం యొక్క శాంతి భద్రతలను మరింత దెబ్బతీస్తాయని మేము స్పష్టం చేశాము. ఇరాన్ తన పొరపాట్లను సరిదిద్దుకుని విజ్ఞతతో వ్యవహరిస్తుందని మేము భావిస్తున్నాము” అని పేర్కొన్నారు.
దీని అర్థం ఏమిటంటే.. “మీ సహాయం మాకు అవసరం లేదు, ఇరాన్ సమస్యను మేమే చూసుకుంటాము” అని సౌదీ పరోక్షంగా పాకిస్తాన్‌కు చెప్పేసింది. యుద్ధం పేరుతో సౌదీ నుండి ఆర్థిక ప్రయోజనాలు పొందాలని చూసిన పాకిస్తాన్ ఆశలపై సౌదీ యువరాజు నీళ్లు చల్లారు.
అసలు ఒప్పందం ఏమిటి? గత ఏడాది పాకిస్తాన్ ప్రధాని షెహబాజ్ షరీఫ్ సౌదీలో పర్యటించినప్పుడు ‘స్ట్రాటజిక్ మ్యూచువల్ డిఫెన్స్ అగ్రిమెంట్’ (Strategic Mutual Defence Agreement) కుదిరింది. దీని ప్రకారం పాకిస్తాన్‌పై దాడి జరిగితే సౌదీ తనపై జరిగినట్లు భావిస్తుంది, సౌదీపై దాడి జరిగితే పాక్ తనపై జరిగినట్లు భావించి స్పందిస్తుంది. ఈ ఒప్పందం ఆధారంగానే పాక్ ఉత్సాహం చూపింది, కానీ సౌదీ మాత్రం ఇరాన్‌తో చర్చల ద్వారా సమస్యను పరిష్కరించుకోవాలని చూస్తోంది.