ఇరాన్, ఇజ్రాయెల్ మరియు అమెరికా మధ్య యుద్ధ భీతి కారణంగా ఇప్పటికే మెజారిటీ దేశాలు ఏదో ఒక సమస్యను ఎదుర్కొంటున్నాయి. ప్రస్తుతానికి భారత్‌కు ఎటువంటి ఆటంకం కలగకుండా, వివాదాస్పద హోర్ముజ్ జలసంధి నుండి LPG నౌకలు సురక్షితంగా చేరుకున్నాయి. దీనివల్ల దేశంలో గ్యాస్ కొరత సమస్య ఒక కొలిక్కి వచ్చింది. అయితే యుద్ధ సెగ మాత్రం పెరుగుతూనే ఉంది, ఇది అన్ని దేశాలపై ప్రతికూల ప్రభావాన్ని చూపుతోంది.
ఆందోళనకర నివేదిక: యుద్ధం నేపథ్యంలో ఒక భయంకరమైన నివేదిక వెలుగులోకి వచ్చింది. ఇరాన్ గనుక ఒక్క అడుగు ముందుకు వేస్తే ప్రపంచమే స్తంభించిపోయే ప్రమాదం ఉంది. ఇందుకు ప్రధాన కేంద్రబిందువు రవాణా మార్గమైన హోర్ముజ్ జలసంధి. ఇరాన్ ఇప్పటికే ఈ మార్గాన్ని పాక్షికంగా నిర్బంధించడంతో ఇంధన సరఫరాకు ఆటంకం ఏర్పడింది. అయితే అంతకంటే ముఖ్యం ఏమిటంటే.. ప్రపంచ ఇంటర్నెట్‌కు ఆధారమైన సముద్రాంతర కేబుళ్లు ఈ హోర్ముజ్ మార్గం గుండానే వెళ్తాయి. ఒకవేళ యుద్ధం తీవ్రమై ఇరాన్ ఈ కేబుళ్లను లక్ష్యంగా చేసుకుంటే ఇంటర్నెట్ కట్ అయ్యే అవకాశం ఉందని అనుమానాలు వ్యక్తమవుతున్నాయి.
ప్రపంచమే ఆగిపోతుంది! ఒకవేళ ఇదే జరిగితే, ప్రపంచవ్యాప్తంగా ఇంటర్నెట్ కనెక్టివిటీకి తీవ్ర అంతరాయం ఏర్పడుతుంది. అన్ని రకాల ఆర్థిక లావాదేవీలు తలకిందులవుతాయి. హోర్ముజ్ జలసంధి మాత్రమే కాకుండా, ఎర్ర సముద్రంలోని బాబ్ ఎల్-మండేబ్ మార్గంలో ఇరాన్ అనుకూల హౌతీ తిరుగుబాటుదారులు దాడులు చేసే ప్రమాదం ఉంది. ప్రపంచ డిజిటల్ వ్యవస్థకు ఇవే హృదయ స్థానాలు. సముద్ర గర్భంలో వేల కిలోమీటర్ల మేర విస్తరించి ఉన్న ఫైబర్-ఆప్టిక్ కేబుల్స్ ద్వారానే మన వీడియో కాల్స్, ఈ-మెయిల్స్, బ్యాంకింగ్ బదిలీలు మరియు AI సేవలు నడుస్తాయి.
డేటా కనెక్టివిటీకి ముప్పు: కేబుల్ డేటా మూలాల ప్రకారం (Telegeography):
- ఎర్ర సముద్రం గుండా సుమారు 17 సముద్రాంతర కేబుళ్లు వెళ్తాయి. ఇవి యూరోప్, ఆసియా మరియు ఆఫ్రికాను అనుసంధానిస్తాయి.
- హోర్ముజ్ జలసంధి గుండా AAE-1, FALCON, గల్ఫ్ బ్రిడ్జ్ ఇంటర్నేషనల్, టాటా-TGN గల్ఫ్ వంటి కీలక కేబుల్ వ్యవస్థలు ఉన్నాయి.
- ఈ మార్గాలు భారతదేశం యొక్క అంతర్జాతీయ డేటా కనెక్టివిటీకి ప్రత్యక్షంగా మద్దతునిస్తాయి.
హోర్ముజ్ జలసంధిలో ఇరాన్ సముద్రపు మైన్లను (Mines) ఉంచడం వల్ల నౌకాయాన సంస్థలు భయపడుతున్నాయి. ఒకవేళ ఈ డిజిటల్ నెట్‌వర్క్‌కు అంతరాయం కలిగితే ప్రపంచ ఆర్థిక వ్యవస్థ తీవ్రంగా దెబ్బతింటుంది.